Мамлакатимизда таълимни, хусусан, олий таълимни ривожлантиришга катта эътибор қаратилмоқда. Бунинг натижаси ўлароқ, олийгоҳларимизнинг халқаро миқёсда ҳам мавқеи ошаётгани кишини қувонтиради.

4 ноябрь куни нуфузли QS Quacquarelli Symonds агентлиги томонидан эълон қилинган Осиёнинг энг яхши университетлари рейтинги — "QS Asia University Rankings 2026" рўйхатидан Ўзбекистоннинг 22 та олий таълим ташкилоти жой олди.

Таъкидлаш жоизки, 8 та олийгоҳимиз натижаси аввалги йилга нисбатан ижобий ўсишга эришган.

Маълумот учун, мазкур рейтингда Осиёнинг 25 та мамлакат ва ҳудудидан 1500 дан ортиқ университетлар баҳоланган бўлиб, улардан 557 таси илк бор рўйхатга киритилган.

Рейтинг илмий салоҳият, халқаро нуфуз, битирувчиларнинг бандлик даражаси, ўқув жараёнининг сифат кўрсаткичлари ҳамда халқаро ҳамкорлик фаолияти мезонлари асосида баҳоланган.

Ўзбекистон олийгоҳлари орасида энг яхши кўрсаткич "Тошкент ирригация ва қишлоқ хўжалигини механизациялаш муҳандислари институти" Миллий тадқиқот университетига тегишли бўлиб, 62.5 балл натижа билан Осиё олийгоҳлари рейтингида 138-ўринни банд этган.

Шербек Исломов,

ЎзА