Велоспорт бўйича Ўзбекистон аёллар терма жамоаси аъзолари Хорватиядаги халқаро турнирда "Париж-2024" Олимпиадасининг муҳим рейтинг очколарини қўлга киритди.

Миллий олимпия қўмитаси хабарига кўра, Хорватияда ташкил этилган "Porec Trophy Ladies" турнирида терма жамоамиз аъзоси Янина Кускова кўҳна қитъанинг энг кучли пойгачилари қатнашган баҳсларда барча рақибларини ортда қолдирди ва турнирнинг олтин медалига сазовор бўлди.  

Маҳоратли велоспортчимиз узунлиги 116 километр масофадан иборат пойгада ғолиб чиқиш билан "Париж-2024" Олимпиадаси йўлида зарур бўлган 40 очкога эга чиқди. Бевосита натижаларга тўхталадиган бўлсак, Кускова белгиланган маррани  3:05:18 кўринишидаги вақтда босиб ўтган бўлса, ундан кейинги қаторлардан жой олган Ирландия ва Словения вакиллари 3:05:19 натижа қайд этишди.  

Мазкур стартда иштирок этган яна бир спортчимиз Ольга Забелинская саккизинчи ўринда пойгани якунлади.  

Янина Кускова ғалабаси шарафига Ўзбекистон байроғи юксалган турнирда иккинчи ва 3-ўринлар ирландиялик Лара Жиллеспие ва словениялик Урска Пинтарга насиб этди.  

Т.Рўзиев,  

ЎзА