Португалиянинг Вале-де-Лобо шаҳрида теннис бўйича мукофот жамғармаси 25 минг АҚШ долларидан иборат "Фьючерс" турнирида мамлакатимиз вакили муносиб иштирок этмоқда.

Мамлакатимизнинг биринчи ракеткаси Ҳумоюн Султонов мазкур турнирнинг 1/4 финалида ATP рейтингида 534-поғонада бораётган чехиялик Гинек Бартонни 7/6(6), 6/2 ҳисобида мағлубиятга учратди. 
Айтиш лозим, чехиялик Бартон турнирнинг илк босқичида мусобақанинг биринчи ракеткасини ўйиндан чиқариб юборганди. Ҳамюртимиз эса уни томошабинлар сафига кузатиб қўйди.

Бугун, 25 ноябрь куни халқаро турнирнинг 1/2 финал босқичида Ҳумоюн Султонов португалиялик Энрике Рохага қарши кортга чиқади.

Дунёнинг 277-ракеткаси ҳисобланган Роха ушбу турнирда учинчи рақам остида таснифланган бўлса, Ҳумоюн олтинчи рақамли иштирокчи саналади. 

ATP рейтингида 436-поғонани эгаллаб турган Султоновга ушбу учрашувда омад тилаймиз.

Т. Рўзиев, ЎзА