Shu kunlarda Qatar poytaxti Doha shahrida Yaqin Sharq va Markaziy Osiyo mamlakatlari universitetlari talabalari uchun "Seeds for the Future" nufuzli ta’lim dasturi tadbirlari o‘tkazilmoqda.
Yaqin Sharq va Markaziy Osiyoning yetakchi universitetlaridan 175 nafar talabani Qatarda ilk bor birlashtirgan mintaqaviy tadbir mahalliy iste’dodlarni rivojlantirish, bilim almashish, AKT sohasi haqida xabardorlikni oshirish va yosh iste’dodlarning raqamli hamjamiyatini rivojlantirishga qaratilgani bilan ahamiyatlidir.
Unda Qatar, Saudiya Arabistoni, Kuvayt, BAA, Bahrayn, Qozog‘iston, Pokiston, Iordaniya kabi mamlakatlardan kelgan vakillar qatorida O‘zbekistonning yettita oliy ta’lim muassasasi talabalari ham ishtirok etmoqda.
Tadbirda O‘zbekiston Respublikasi raqamli texnologiyalar vaziri o‘rinbosari Rustam Karimjonov so‘zga chiqdi.
– AKT iqtisodiy o‘sish, ish o‘rinlarini yaratish va raqamli tafovutni ko‘paytirishni ta’minlamoqda. O‘zbekiston kelajagiga sarmoya kiritish bo‘yicha majburiyatimiz o‘qituvchilar malakasini oshirish, AKT infratuzilmasini kengaytirish va maxsus ishlab chiqilgan iqtidor dasturlarini ishlab chiqishni o‘z ichiga olgan keng qamrovli sa’y-harakatlarni talab qiladi. “Huawei” kompaniyasi kabi hamkorlarimiz ko‘magida biz o‘z oldimizga qo‘ygan ulkan maqsadlarga erishish va yoshlarimizning istiqbolli kelajagini ta’minlashga ishonchimiz komil, – dedi R.Karimjonov.
[gallery-13455]
“Huawei” kompaniyasining Yaqin Sharq va Markaziy Osiyodagi vitse-prezidenti Van Shunli kompaniya Yaqin Sharq va Markaziy Osiyoda, jumladan, O‘zbekistonda ochiq, umumiy AKT iste’dodlar ekotizimini rivojlantirish tarafdori ekanini aytib o‘tdi.
– “Seeds for the Future“ bizning asosiy global korporativ ijtimoiy mas’uliyat dasturimiz bo‘lib, iste’dodlarni o‘z mamlakatlari kelajagini shakllantirishga ilhomlantiradi. Biz dasturimizni qo‘llab-quvvatlaganliklari uchun minnatdormiz va 2023 yil ishtirokchilariga eng yaxshi tilaklarimizni bildiramiz, – dedi Van Shunli.
Ta’kidlash kerakki, “Seeds for the Future“ – “Huawei” kompaniyasining butun dunyo bo‘ylab AKT iste’dodlarini rivojlantirishga qaratilgan korporativ ijtimoiy mas’uliyat bo‘yicha ta’lim dasturidir. 2008 yildan tatbiq etilgan ushbu dasturga 139 mamlakatdan 15 mingdan ortiq talaba a’zo bo‘lgan. O‘tgan yillarda 450 dan ortiq davlat sektori vakillari loyiha ishtirokchilarini qo‘llab-quvvatlagan.
Ayni chog‘da dasturning birinchi bosqich ishtirokchilari ilg‘or AKT texnologiyalari, ilmiy va texnologik yetakchilik, global mavzular bo‘yicha munozaralar kabi mavzularda intensiv treninglar va seminarlarda ishtirok etmoqda. E’tiborlisi, dastur doirasida “Seeds for the Future Tech4Good” tanlovi o‘tkaziladi. Tanlov g‘oliblari joriy yilning 10-16 sentyabr kunlari BAAning Dubay shahrida bo‘lib o‘tadigan ushbu dasturning ikkinchi bosqichida ishtirok etadi. Unda g‘oliblikni qo‘lga kiritgan jamoalar Xitoyda bo‘lib o‘tadigan yakuniy musobaqada qatnashadi.
Nasiba ZIYODULLAEVA, O‘zA muxbiri