Ўзбекистонлик олим Нурсултон Назарбоев имзоси билан мукофот олди
У Қозоғистон халқлар ассамблеясининг «Бирлик» олтин медали билан тақдирланди.
Алишер Навоий номидаги Тошкент давлат ўзбек тили ва адабиёти университети Илмий тадқиқотлар ва илмий педагог кадрлар тайёрлаш бўлими бошлиғи PhD Нодирбек Жўрақўзиев Қозоғистон ва Ўзбекистон ўртасидаги дўстлик, маданий-маърифий ҳамда илмий алоқаларни ривожланишига қўшган ҳиссаси учун Қозоғистон Республикаси биринчи Президенти Нурсултон Назарбоев имзоси билан Қозоғистон халқлар ассамблеясининг «Бирлик» олтин медали билан тақдирланди.
Нодирбек Жўрақўзиев Фарғона вилояти Бешариқ туманида туғилган. 2018 йилда филология фанлари бўйича фалсафа докторлигини ҳимоя қилган. 50 дан ортиқ илмий мақолалар муаллифи. Мақолалари хориждаги нуфузли илмий журналларда чоп этилган.
ЎзА