Халқаро енгил атлетика федерацияси (World Athletics) ҳар ҳафтанинг чоршанба куни енгил атлетиканинг барча йўналишлари бўйича янгиланган жаҳон рейтингини эълон қилиб боради.

Ўтаётган ҳафтанинг янгиланган рейтингидан Ўзбекистон терма жамоасининг 4 нафар аъзоси ўз йўналишларида кучли юзликда қайд этилди.

Баландликка сакраш дастурида рейтингни украиналик Ярослава Магучих 1446 очко билан бошқараётган бўлса, ҳамюртимиз Сафина Саъдуллаева 1264 очко билан жаҳон рейтингида 12-поғонани, Осиёда 1-ўринни эгаллаб турибди. Ушбу йўналишда яна бир спортчимиз Барнохон Сайфуллаева 1131 очко билан ТОП-100ликнинг 60-қаторидан жой эгаллади. Барнохон Осиёнинг 6-рақамдаги кучли спортчиси сифатида эътироф этилган.

Рейтингнинг уч ҳатлаб сакраш дастурида кубалик Леянис Перес Эрнандес 1405 очко билан юзлик рўйхатни бошқараётган вазиятда терма жамоамиз аъзоси Шарифа Давронова 1214 очко билан жаҳон рейтингида 19-ўринни, қитъа рейтингида 1-қаторни банд этди.

Енгил атлетиканинг ядро улоқтириш дастури рейтингида кучли юзталик рўйхатда яна бир спортчимиз 21 ёшли Малика Насриддинова 1090 очко билан 51-поғонада кўриниш берди. Ушбу дастурда 31 ёшли АҚШлик Чейз Жексон 1435 очко билан етакчилик қилмоқда.

Т.Рўзиев,

ЎзА