13 сентябрь куни мамлакатимизга АҚШ ҳукумати томонидан COVAX дастури асосида ажратилган 1 миллион 200 минг доза Pfizer-BioNTech вакцинаси келтирилди.

– Биз COVID-19га қарши курашда глобал бирдамликнинг гувоҳи бўляпмиз ва пандемияга қарши курашда кўрсатилаётган ёрдам учун миннатдормиз, – деди Санитария-эпидемиологик осойишталик ва жамоат саломатлиги хизмати бошлиғи Баҳодир Юсупалиев. – Бугун қабул қилиб олинган вакциналар бутун мамлакат бўйлаб тақсимланади.

COVAX дастури доирасида COVID-19га қарши вакцинацияни амалга оширишни тезлаштириш учун Ўзбекистонга яқин ойларда қўшимча препаратлар келтирилиши кутилмоқда. Ушбу дастур барча мамлакатларни хавфсиз ва самарали вакциналар билан таъминлашга қаратилган.

Айни пайтда Ўзбекистонда ZF-UZ-VAC2001, AstraZeneca, "Sputnik V" ва Moderna вакциналаридан фойдаланилмоқда. Pfizer/BioNTech вакцинаси юртимизга қўлланилаётган бешинчи вакцина бўлди.

Соғлиқни сақлаш вазирлигидан хабар қилишларича, мамлакатимизга келтирилган жами вакциналар 24 миллион дозадан ошган. Айни кунгача тўлиқ эмланган фуқаролар 3 миллион 121 минг нафарни ташкил қилмоқда.