Маълумки, қимматбаҳо тошлардан ва металлардан ясалган заргарлик буюмларини чегара божхона постлари орқали Ўзбекистонга олиб кириш ва ундан олиб чиқиш бевосита амалдаги меъёрлар асосида тартибга солинади.

Жумладан, жисмоний шахслар Ўзбекистон ҳудудига ўз эҳтиёжлари учун 65 граммгача бўлган заргарлик буюмларини олиб киришлари мумкин. Бунда олиб кираётган йўловчи заргарлик буюмларини оғзаки декларациялаш орқали яшил йўлакдан ҳаракатланиши мумкин. 65 граммдан кўп бўлган заргарлик буюмларини олиб кириш эса, бевосита божхона тўловларини тўлаган ҳолда амалга оширилади.  

Божхона тўловлари миқдори қонунчиликда қайд қилинган асосда белгиланади. Тўловлар миқдори олиб кирилаётган заргарлик буюмлари тури ва вазнига кўра ўзгаради.

Ўзбекистон резидентлари ва норезидентлари бўлган жисмоний шахслар эса қиймати 5 минг АҚШ долларидан ортиқ бўлган заргарлик буюмларини божхона юк декларациясида кўрсатган ҳолда олиб чиқишига рухсат берилган.

Афсуски, бугунги кунда белгиланган тартибга амал қилмасдан заргарлик буюмларини хорижга олиб чиқишга уринишлар кўп учрамоқда. Хусусан, “Тошкент халқаро аэропорти" чегара божхона пости ходимлари Олмаота шаҳридан учиб келган фуқарони тегишли тартибда божхона назоратидан ўтказиш давомида ўз вақтида тақдим этилмаган қиймати 227 миллион 500 минг сўмлик 182 граммлик заргарлик буюмларини аниқлади.

Яна бир ҳолатда Бишкек шаҳрига парвозга отланган фуқарода Ўзбекистон Республикасидан олиб чиқиб кетиш меъёридан ортиқча бўлган, муқобил манбаларга кўра тахминий қиймати 70 миллион сўмлик 1 дона ўлчовли олтин қуймаси борлиги аниқланди.

Мазкур ҳолатлар бўйича суриштирув ишлари олиб борилмоқда.

Ш.Маматуропова,

ЎзА