АОКАда “Ўзчармсаноат” уюшмаси ахборот хизмати раҳбари Феруза Маҳмудова ишда брифинг бўлиб ўтди. Унда маълум қилинишича,

Ўзбекистонда ишлаб чиқарилган чарм-пойабзал маҳсулотлари 54 та мамлакатга экспорт қилинади.  

Қайд этилишича, 2023 йил якунига келиб соҳа корхоналари томонидан жами 242 миллион долларлик 175 та инвестиция лойиҳасини амалга ошириш мақсад қилинган.  

Бунинг натижасида 10 мингдан ортиқ янги иш ўрни яратилиши режалаштирилган. Шунингдек, соҳа корхоналари томонидан 7 триллион 800 миллиард сўмлик маҳсулот ишлаб чиқарилиши таъминланади.  

Ҳисобот даврида чарм-пойабзал ва мўйначилик соҳада жами 73 миллион 600 минг долларлик инвестиция ўзлаштирилиб, 47 та лойиҳа ишга туширилди. 2 мингдан ортиқ янги иш ўрни яратилди.  

Шунингдек, Тошкент вилояти Чирчиқ туманининг 60 гектар ер майдонида Хитой пойабзал брендларини ишлаб чиқаришга ихтисослашган саноат зонасини ташкил этиш борасида музокаралар бошланди.  

Биринчи ярим йиллик натижалари билан 273,4 миллион долларлик маҳсулот экспорт қилинган бўлиб, бу кўрсаткич 2022 йил мос даврига нисбатан 140 фоизни ташкил этди. 2023 йил якуни билан бу кўрсаткич 610 миллион долларга етказилади.  

Экспорт фаолиятига 62 та янги экспортчи корхона жалб қилинади, четга чиқарилаётган маҳсулотлар тури эса яна 24 га оширилиши бўйича ишлар олиб борилмоқда.  

Ш.Маматуропова, ЎзА