Янгиланган “Ўзбекистон – 2030” стратегиясига мувофиқ, мамлакатда пуллик автомобиль йўлларини босқичма-босқич жорий этиш режалаштирилган.

Режага кўра, дастлабки 50 километрлик пуллик йўл участкаси 2027 йилда фойдаланишга топширилади. Кейинчалик лойиҳа босқичма-босқич кенгайтирилиб, 2028 йилга келиб йўллар узунлиги 75 километрга, 2029 йилда 100 километрга етказилиши кутилмоқда. 2030 йилга бориб эса пуллик автомобиль йўлларининг умумий узунлиги 130 километрни ташкил этиши кўзда тутилган. 

Стратегияда мамлакатнинг глобал транспорт-логистика тармоқларига интеграциясини кучайтириш ва миллий транспорт тизими салоҳиятини оширишга қаратилган муҳим вазифалар белгиланган.

Шунингдек, Тошкент – Самарқанд, Тошкент – Фарғона водийси ва бошқа йўналишларда пуллик йўллар қуриш режалаштирилган. 

Бироқ 2026 йил давомида бирорта йўналишда пуллик йўллар тўлиқ ишга туширилмайди. Ҳужжатда илк пуллик йўлнинг аниқ йўналиши ҳозирча кўрсатилмаган. 

Лойиҳаларни амалга ошириш хусусий сектор маблағлари ҳисобига молиялаштирилади. Ижро учун масъул орган сифатида эса Ўзбекистон Республикаси Транспорт вазирлиги белгиланган. 

Б.ХУДОЙБЕРДИЕВ, ЎзА