Ўзбекистон Республикаси Президентининг мамлакатимизда таълим-тарбия тизимини ривожлантиришда Финляндия таълим тизимини ўрганиш ва жорий этиш бўйича белгилаб берган вазифалари ижросини таъминлаш мақсадида ушбу мамлакат таълим ташкилотлари билан ҳамкорликда бир қатор ишлар амалга оширилмоқда.

Хусусан, Ўзбекистон делегацияси 2021 йил ноябрь ойида Финляндияга  ташриф буюрган эди. Ташриф давомида мамлакатимиздаги давлат ва нодавлат олий таълим ташкилотлари билан Финляндиянинг етакчи университетлари ўртасида ўзаро академик мобилликни кучайтириш ва ҳамкорликни йўлга қўйиш бўйича келишиб олинганди.

Куни кеча икки давлат вакиллари ҳамкорлигининг амалий натижаларидан бири сифатида Тошкент шаҳрида Халқаро Нордик университети (“Nordic International University”) нодавлат таълим ташкилоти иш бошлади.

Мазкур университетга юртимизда нодавлат олий таълим хизматларини кўрсатиш учун Таълим сифатини назорат қилиш давлат инспекцияси томонидан лицензия берилди.

Финляндиянинг Карелия амалий фанлар университети, “Helsingin Suomalainen Yhteiskoulu (SYK)” умумтаълим мактаби, “NOKIA” трансмиллий корпорацияси, “Finnish Water Forum” ва “ISKU” компанияси ушбу университет билан ҳамкорлик қилишга тайёр эканликларини маълум қилишган.

Финляндия таълим моделига асосланган мазкур университет 2022/2023 ўқув йилидан бошлаб қуйидаги йўналишлар бўйича кадрлар тайёрлашни бошламоқда:

Иқтисодиёт (тармоқлар ва соҳалар бўйича),

Молия ва молиявий технологиялар,

TU BA (Hons)  халқаро бизнес,

BU BSc (Hons)  саноат менежменти,

Бошланғич таълим,

Мактабгача таълим,

Хорижий тил ва адабиёти (тиллар бўйича),

Компьютер инжиниринги (“Компьютер инжиниринги”, “АТ-сервис”, “Ахборот хавфсизлиги”, “Мультимедиа технологиялари”)

Таълим жараёни Финляндиянинг Карелия амалий фанлар университети билан тузилган 2+2 ва 3+1 дастурлари асосида амалга оширилади.

Халқаро Нордик университети талабаларга қуйидаги имкониятларни тақдим этишни режалаштирмоқда:

– Барча курслар бўйича таълим йўналишидан қатъи назар, Шимолий Европа мамлакатлари, хусусан, Финляндияда ёзги амалиёт, WORK AND TRAVEL дастурлари;

– Финляндиянинг “NOKIA” трансмиллий корпорацияси, Карелия амалий фанлар университети, “Helsingin Suomalainen Yhteiskoulu (SYK)” умумтаълим мактаби, “Finnish Water Forum” ва “ISKU” компанияларида ўқув амалиётлари;

– барча таълим йўналишлари учун фин ўқитувчилари томонидан фин тилини чуқурлаштириб ўргатиш;

– бакалавриат босқичини муваффақиятли (юқори GPA кўрсаткичи билан) тугатганлар учун магистратурани Финляндияда имтиёз асосида ўқиб келиш имкониятлари тақдим этилади.