O‘ZBEKISTON YOSHLARI
30 iyun — Yoshlar kuni!
Baland toqqa chiqib boqsang, bu hasratli zamonga,
Suqlanib nur sochar quyosh O‘zbekiston tomonga.
Illo, Vatan tuprog‘ining tafti bugun o‘zgacha,
O‘zgachadir tilovatu qo‘shiq, navo, so‘zgacha.
Bugun yurtning ishonch tog‘i, orzu-umid mash’ali,
Buyuk Turon yoshlaridir - O‘zbekiston yoshlari.
Jahd qilsangiz Asqartog‘lar poyingizda yotadir,
Yurtboshimiz O‘zi sizga ham ustoz, ham otadir.
Siz poydevor qo‘ymoqdasiz yangi zamon fasliga
Va Uchinchi Renessansning mahobatli qasriga.
Siz Buxoriy, siz Termiziy, siz Behbudiy, hojisiz,
Siz millatning Ko‘hinuri - boshidagi tojisiz.
Bu dunyoda O‘zbekiston - o‘zbek mangu bor bo‘lsin,
Ukalarim, sizga g‘ayrat, o‘tli shiddat yor bo‘lsin.
Abdusaid Ko‘chimov,
O‘zbekistonda xizmat ko‘rsatgan yoshlar murabbiyi