БОКС

Осиё чемпионатида Ўзбекистон ёшлар терма жамоаси медаллар жамғаришда ҳам, олтин медаллар сони бўйича ҳам умумжамоада 1-ўринни эгаллади.

Бундан икки ҳафта муқаддам Иордания пойтахти Амманда бокс бўйича 2006-2007 йилларда таваллуд топган ўсмирлар ва 2004-2005 йиллар оралиғидаги ёшлар ўртасида бошланган Осиё чемпионатининг сўнги финал жанглари кеча бўлиб ўтди.

Хабар берганимиздек, кеча қитъа чемпионатининг кечки дастуридан ўрин олган ўғил болалар ўртасидаги финал жангларида 10 нафар боксчимиз қатнашиб, уларнинг 7 нафари олтин медалларга мушарраф бўлишди.

Қизлар ўртасидаги финал баҳсларида эса 9 нафар ҳамюртимизнинг 2 нафари Осиё чемпионлигига эришди.

Ёшларимиз чемпионатда умумий ҳисобда 7 та олтин, 3 та кумуш ва 2 та бронза медалларини жамғарган бўлса, ёш қизларимиз ушбу мусобақани 2 та олтин, 7 та кумуш ва 2 та бронза медали билан якунлашди.

Эътиборли жиҳати, мамлакатимизнинг ёш боксчилари олтин медаллар ҳисоби бўйича ҳам, умумий медаллар сони жиҳатдан ҳам қитъада тенгсиз эканлигини яна бир карра намойиш этди.

Иорданиядаги муросасиз баҳсларда олтин медалларга мушарраф бўлган ватанимизнинг шижоатли боксчилари Хўжаназар Нортожиев, Абдували Бўрибоев, Бахтиёр Асадов, Фазлиддин Эркинбоев, Раҳматулло Бойматов, Абдулазиз Абдураҳмонов, Айназар Кенесбаев, Саҳобат Ҳусанова ва Азиза Зокирова номлари Осиё бокс тарихига муҳрланди.  

Чемпионатда 49 нафар боксчи билан иштирок этган Ўзбекистон ёшлар ва ўсмирлар терма жамоаси якунда 46 та медалга мушарраф бўлди.

Иордания мезбонлик қилган қитъа биринчилигида аввалига ўсмирларимиз, кейин эса ёшларимиз умумжамоа ҳисобида биринчи ўринни қўлга киритганлиги ўзбек боксининг шонли ғалабалари бардавом эканлигини намоён этди.

Мазкур чемпионатда зафар қучган боксчиларимиз 15 мартдан 16 мартга ўтар кечаси Тошкент шаҳрига етиб келишади.

Тўлқин Рўзиев, ЎзА