Шу кунларда Ёшлар ишлари агентлиги томонидан ҳудудларда ўтказилаётган “Ўзбекистон ёшлар форуми – 2021” лойиҳаси доирасида ёшлар иштирокида бир қатор тадбирлар ташкил этилмоқда.

Мазур форум доирасида “Бизнес марафон” лойиҳаси нафақат вилоят ва шаҳар марказларида, балки чекка туманларда ҳам ўтказилмоқда. Маҳоратли тадбиркорлар иштирокида ташкил этилаётган бу каби “Бизнес марафон” дан кўзланган асосий мақсад ўз бизнесини йўлга қўйиш истагида бўлган ёшларга бизнесга оид маслаҳатлар бериш, улар томонидан ишлаб чиқарилган маҳсулотларнинг рақобатбардошлигини таъминлаш, маҳаллий ишлаб чиқарувчи ёшларни қўллаб-қувватлашдан иборат.

Лойиҳа доирасида ёшлар билан учрашув Навоий вилоятининг Хатирчи туманида ташкил этилди. Туман ҳокимлиги, Ёшлар ишлари агентлиги, “Ёшлар – келажагимиз” жамғармаси ҳамда “Mfaktor”, “THOMPSON” компанияси масъуллари ҳамкорлигида тумандаги “Осиё грант” тантаналар саройида ташкил этилган “Бизнес марафон”да ҳудуддаги 700 дан ортиқ тадбиркорлик субъекти, шунингдек, тадбиркорлик билан шуғулланиш истагидаги ёшлар иштирок этди.

Бизнесда катта тажрибага эга тадбиркорлар “Муваффақиятга эришиш сирлари” мавзусида ёшлар билан мулоқот қилди. Мотивацион тренинг дарсларида иштирок этган спикерлар ўзларининг бизнесдаги илк қадамлари ҳақида ҳам маълумот бериб, ёшларни ўзлари қизиққан соҳада қўрқмасдан фаолият бошлаши лозимлигини алоҳида таъкидлади.

–“Бизнес марафон”да биринчи маротаба иштирок этдим, – дейди тумандаги 34-сонли мактаб ўқувчиси Бегали Саидаҳмедов. – Тадбирда тадбиркорликни эндигина бошлаган ёки бошлаш арафасида турган ёшларга тажрибали соҳа вакиллари томонидан маслаҳатлар берилди. Ҳар бир айтилган таклиф ва маслаҳатлар аниқ мисолларда тушунтириб берилди. Бу эса ёшлардаги қўрқув ва иккиланишларни енгишга ёрдам беради. Шунингдек, “Бизнес марафон” лойиҳаси доирасидаги навбатдаги учрашув Қизилтепа туманидаги “Истиқлол" мажмуасида ўтказилди.

Ёш бўлишига қарамасдан келажакдаги орзуларига эришиш учун ҳозирдан ҳаракат қилаётган, келгусида юртимизнинг ҳар томонлама ривожланишига муносиб ҳисса қўшишни ният қилган, дадиллик билан ўз ғоя ва таклифларини илгари сурган бўлажак тадбиркорларга спикерлар томонидан замонавий компьютерлар совға қилинди.

Абдували Бўриев, ЎзА