Мамлакатимизда саноат ва инновация соҳасида халқаро ҳамкорлик тобора кенгайиб бормоқда. Айниқса, хорижий инвесторлар ва йирик корпорациялар билан ўзаро алоқалар янги қадамларни белгилаб беряпти.

Шу маънода, “Чирчиқ” кимё-индустриал технопаркига Япониянинг етакчи кимё корпорацияси – “Kansai Chemicals Group” вакилларидан 
иборат делегация ташрифи ҳам муҳим аҳамият касб этади. 

Ушбу ташриф доирасида томонлар технопарк имкониятлари, инвестициявий муҳит ва истиқболли ҳамкорлик йўналишларини атрофлича муҳокама қилди.

Таъкидлаш керакки, дунёга машҳур “Kansai Chemicals Group” корпорацияси вакилларидан иборат делегация амалий ташрифининг асосий мақсади технопаркнинг инвестициявий салоҳияти, замонавий инфратузилмаси ва ишлаб чиқариш қувватлари билан танишиш, шунингдек, икки томонлама ҳамкорлик йўналишларини ўрганишдан иборат бўлди. Унда юқори технологик лойиҳаларни жойлаштиришга тайёр бўлган мавжуд ва қурилаётган ишлаб чиқариш майдонларининг салоҳиятига алоҳида эътибор қаратилди.

Технопарк вакиллари томонидан меҳмонларга резидентларни қўллаб-қувватлаш чоралари, қўлланиладиган солиқ ва божхона имтиёзлари, преференциялар, шунингдек, технопарк ҳудудида ишлаб чиқаришларни жойлаштиришнинг афзалликлари ҳақида маълумот берилди.

Меҳмон томоннинг таъкидлашича, ушбу компаниянинг асосий йўналиши  юқори сифатли ва экологик хавфсиз кимёвий маҳсулотлар ишлаб чиқаришга қаратилган. Ўзбекистонда барпо этилган замонавий кимё-индустриал технопарк имкониятлари жуда кенг. Бу эса келгусида қўшма лойиҳаларни амалга ошириш ва технологиялар алмашинувига кенг йўл очади.

"Ўзкимёсаноат" АЖ ахборот хизматига кўра, "Kansai Chemicals Group" вакилларининг ташрифи “Чирчиқ” технопаркининг йирик лойиҳаларни амалга оширишда ишончли ҳамкор сифатидаги мақомини яна бир бор тасдиқлайди.

Н.Зиёдуллаева,

ЎзА