Ипакчилик ва жун саноатини ривожлантириш қўмитасида Вьетнам давлати билан ҳамкорликда ипакчилик соҳасида олиб борилаётган ишларни янада мустаҳкамлаш мақсадида мазкур мамлакат делегацияси аъзолари билан учрашув бўлиб ўтди.

Маълумки, кейинги йилларда давлатимиз раҳбарининг топшириғига асосан ипакчилик соҳасида Ўзбекистон ва Вьетнам ўзаро манфаатли ҳамкорлик алоқаларини ривожлантириб, бир қатор қўшма лойиҳаларни амалга оширмоқда.    

Хусусан, жорий йилнинг март ойида мамлакатимиз ипакчилик тармоғи вакиллари, жумладан, Ипакчилик ва жун саноатини ривожлантириш қўмитаси раиси Баҳром Шарипов бошчилигидаги делагация аъзолари Вьетнам давлатига ташриф буюриб, у ердаги ипакчилик соҳасида олиб борилаётган ишлар билан танишган эди.  

Ташриф доирасида вьетнамлик тадбиркорлар билан 12 та йирик экспорт шартномаси, 9 та қўшма инвестиция лойиҳаларини амалга ошириш ва илмий тадқиқот ишларида ўзаро ҳамкорлик қилиш бўйича тегишли ҳужжатлар имзоланган. Мазкур келишувлар доирасида “Ўзбекипаксаноат” уюшмаси тизим корхоналари ва компаниялари билан 33 миллион долларлик экспорт шартномалари имзоланди.  

Шунингдек, Фарғона вилоятида 1 та ипак қурти уруғчилиги “Элита” ва “Суперэлита” қўшма корхонаси ҳамда 10 та пиллани чуқур қайта ишлаш бўйича жами 11 та қўшма корхонани барпо этиш ва ўзаро ҳамкорлик алоқаларини кенг йўлга қўйиш бўйича Ипакчилик ва жун саноатини ривожлантириш қўмитаси ҳамда Вьетнамнинг Minh sang Co.LTD компанияси ўртасида келишув баённомаси имзоланди.  

<iframe width="560" height="315" src="https://www.youtube.com/embed/_L8HlVdYh0s" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Шу муносабат билан ташкил этилган учрашувда Ўзбекистон ва Вьетнамдаги ипакчилик тармоғи ташкилотлари, илмий муассасалар билан кенг қамровли ҳамкорлик алоқаларини янада ривожлантириш ҳамда қўшма лойиҳаларни амалга оширишни давом этириш масалалари муҳокама этилди.  

Шунингдек, Вьетнам делегацияси 20-21 май кунлари Фарғона ва Андижон, 22 майда Хоразм, 23 майда Бухоро, 24 майда Самарқанд, 25 майда Қашқадарё ҳамда 26-27 май кунлари Сурхондарё вилоятларида қўшма лойиҳаларни амалга ошириш ва экспорт ҳажмини кўпайтириш бўйича маҳаллий ҳокимликлар ва соҳа вакиллари билан муҳим учрашувлар ўтказиши кўзда тутилган.  

Гулноза Бобоева,  

Донёр Яқубов,(видео) ЎзА