Хитойнинг инновацион технологиялар бозорида электрон саноат тез суръатлар билан ривожланмоқда. Бу жараёнда Ўзбекистон ишлаб чиқарувчилари ҳам халқаро ҳамкорлик ва тажриба алмашинуви орқали ўз салоҳиятини оширмоқда.

Жорий йилнинг 28-30 октябрь кунлари “Ўзэлтехсаноат” уюшмаси масъул ходимларидан иборат делегация ишбилармонлик ташрифи билан Хитой Халқ Республикасида бўлди.

Мазкур ташриф доирасида “Ўзэлтехсаноат” уюшмаси ва унинг таркибидаги корхоналар вакиллари Хитойдаги йирик халқаро тадбир - “Shenzhen World Exhibition 2025” халқаро кўргазмасида ҳам иштирок этди. 

Кўргазма давомида Хитойнинг етакчи компаниялари билан ҳамкорлик алоқаларини янада мустаҳкамлаш бўйича учрашувлар ташкил этилди. 

Шунингдек,  делегация “China Printed Circuit Association” (CPCA) билан музокаралар ўтказиб, қўшма лойиҳаларни амалга ошириш, технологик трансфер ва корхоналар ўртасидаги кооперацияни кучайтириш масалаларини муҳокама қилди.  Қайд этилганидек, томонлар  ўртасида электроника, босма плата (PCB) саноати ва компонентлар бўйича ҳамкорликни кенгайтириш, илғор технологияларни жорий этиш ҳамда инвестицион алоқаларни ривожлантириш муҳим ҳисобланади. 

Қайд этиш керакки, “Shenzhen World Exhibition 2025” электрон компонентлар, PCB ва смарт-технологиялар йўналишидаги энг йирик халқаро кўргазмалардан бири. Шу сабабли, Ўзбекистон корхоналарининг ушбу нуфузли тадбирда ўз имкониятларини намоён этиши муҳим аҳамият касб этади.

Н.Зиёдуллаева, ЎзА