Ўзбекистонда фаолият юритадиган “NUR-HAS” шинкиокушинкай каратэ маркази АҚШ каратэ федерацияси билан беш йилга мўлжалланган ҳамкорлик меморандумини имзолади.

Келишув ҳужжатига мувофиқ, "NUR-HAS" каратэ маркази катта мураббийи, 5-ДАН қора белбоғ соҳиби Мутал Назаров жорий йилнинг 8-21 май кунлари АҚШнинг Лас-Вегас, Нью-Йорк ва бошқа бир қатор шаҳарларида ўтказилган халқаро семинарларда ўз тажрибалари билан ўртоқлашди.

АҚШ, Жанубий Корея, Ўзбекистон давлатларининг маҳоратли каратэчилари иштирокида ташкил этилган семинарлар жараёнида амалий ва назарий машғулотлар ўтказилиб, шинкиокушинкай каратэ йўналишидаги янгиликлар хусусида фикр алмашилди.

2025 йилги спорт тақвим режасига биноан, 5-ДАН қора белбоғ соҳиби Мутал Назаров жорий йилнинг июнь ойида Япониянинг Токио шаҳрида фулл-контакт каратэ бўйича ўтказиладиган биринчи жаҳон чемпионатида Ўзбекистон номидан татамига чиқиши режалаштирилган.

Т.Рўзиев,

ЎзА