Тошкент фотосуратлар уйида туркиялик ижодкорлар Эмине Солак ва Сетенай Алпсойнинг “Санъат: анъаналардан келажак сари” номли кўргазмаси очилишига бағишланган тадбир бўлиб ўтди.

Ўзбекистон ва Туркия ишбилармонлари уюшмаси — UTİD ташкил топганининг 30 йиллигига бағишланган кўргазманинг биринчи залида рассом Эмине Солакнинг миниатюра ва нозик безак санъатига таянган асарлари намойиш қилинди. Санъаткор қадимий услуб ва замонавий композицион ечимларни уйғунлаштириб, ранг ва сувнинг табиий ҳаракати орқали ички сокинлик, мулоҳаза ва руҳий покланиш ҳолатини яратади. Унинг асарларида анъана – замонавийликни йўқотмаган эстетика, майин ранглик эса улуғвор бадиий камтарлик сифатида намоён бўлди.

Иккинчи зал эса Сетенай Алпсойнинг шаҳар ва инсон ўртасидаги руҳий диалогга бағишланган рангтасвирлари билан тўлди. Рассом шаҳар ритми, теварак-атрофдаги ҳаракат, одам руҳиятидаги тартиб ва тартибсизлик, хотира ва тасаввур алмашинуви каби ҳолатларни бадиий шаклга солади. Унинг асарлари томошабинни шунчаки кузатувчи эмас, балки ички суҳбати уйғонган иштирокчига айлантиради.

Тадбирда қайд этилганидек, мазкур кўргазма икки халқ бадиий тафаккуридаги муштарак илдизлар, тарихий хотира ва замонавий дунёқарашнинг учрашув майдонига айланди. Бу ерда анъана нафақат мерос сифатида, балки келажакни яратишга илҳом бағишлайдиган манба сифатида кашф этилди.

Гулноза Бобоева, ЎзА