Бундан бир ҳафта муқаддам бошланган ўсмирлар ва катталар ўртасидаги Ўзбекистон чемпионати мамлакатимиз оғир атлетика спорти тарихида ўзига хос воқеа бўлди.

Боиси, Ўзбекистон спорт тарихида ҳали ҳеч бир чемпионатда икки нафар олимпия ўйинлари ғолиби, 10 нафардан зиёд ёшлар ва катталар ўртасидаги жаҳон чемпионлари мамлакат миқёсидаги мусобақада бир вақтда иштирок этмаган эди.

Шу жиҳатдан Спортни ривожлантириш вазирлиги тақвим режаси асосида ташкил этилган мазкур чемпионат нафақат ўзбекистонлик оғир атлетика мутахассис ва мухлислари, балки хорижликлар томонидан унда қатнашаётган тажрибали спортчиларнинг ҳар бир чиқиши катта қизиқиш билан кузатиб борилди.

Хабар берганимиздек, ўзбек оғир атлетикасининг келажаги бўлган ўсмирлар ўртасидаги баҳсларда медаллар жамғариш борасида Хоразм вилояти вакиллари 4 тадан олтин ва кумуш ҳамда 3 та бронза медали билан 1-ўрин эгаллашди. 2-ўрин Андижон вилояти (7 медаль) вакилларига, 3-ўрин эса 5 та медалга эгалик қилган Бухоро вилояти полвонларига насиб этди.

Жорий йилнинг 19 март куни катталар ўртасида Ўзбекистон чемпионати баҳслари бошланиб, бугун 21 март куни нуфузли мусобақанинг сўнгги ғолиблари аниқланди.

Чемпионатнинг охирги кунги мусобақаларида Рио ва Токио Олимпиадаси ғолиблари Руслан Нурудинов 109 килограмм оғирликда, Акбар Жўраев +109 килограммда Ўзбекистон чемпионлиги учун баҳсларга киришганлиги ҳар икки номдор спортчимиз Париж-2024 олимпия ўйинлари йўлида муносиб тайёргарлик босқичини бошлаганлигини кўрсатди.

Нурудинов ва Жўраев ўз вазн тоифаларида Ўзбекистон чемпионлигига эришиши билан мусобақаларда билвосита ва бевосита қатнашган спортчиларга мастер-класс ўтади, дейиш мумкин.

Бугун 21 март куни, шунингдек, 102 ва 96 кг. вазнларда ҳам мамлакатнинг энг кучли оғир атлетикачилари аниқланди. 96 кг. оғирликда самарқандлик Ҳожиакбар Олимов 1-ўринни эгаллаган бўлса, ушбу вазнда 2021 йили қитъа чемпионлигига эришган қашқадарёлик Қурбонмурод Номозов 102 кг.да омадини синаб кўрди.

Асли самарқандлик, Қашқадарё оғир атлетика мактабида камолга етаётган Номозов катталар ўртасидаги мамлакат чемпионатида 18 ёш пайтида чиқиши ва якуний сарҳисобга кўра, 3-ўринни эгаллаши юртимизда олимпия ва жаҳон чемпионлари бўлган донгдор спортчиларимиз Нурудинов ва Жўраевнинг муносиб издоши етишиб келаётганлигини кўрсатди. Ушбу вазнда 1 ва 2-ўринлар Суннат Ўсаров ва Шарофиддин Амриддиновга насиб этди.

Наврўз тантаналари билан ҳамоҳангликда ўтган Ўзбекистон чемпионатининг ғолиб ва совриндорлари муносиб тарзда тақдирланди.

Оғир атлетика бўйича Ўзбекистон терма жамоаси бош мураббийи Баҳром Мендибоевнинг билдиришича, мусобақалар талафотсиз ва юқори даражада ўтказилди. Бир қатор номдор спортчиларимизнинг ҳар бир чиқиши хорижий мутахассислар томонидан тасвирга олинди. Бу албатта, уларнинг Ўзбекистон оғир атлетикасига, спортчиларга катта қизиқишидан далолат.

Ушбу чемпионат орқали энг муҳими, жорий йил ҳамда келгуси йилларда ватанимиз шарафини ҳимоя қиладиган терма жамоа таркиби шакллантириб олинди. Тажрибали спортчилар ўз имкониятларини яна бир бор кўрикдан ўтказишди.

Т. Рўзиев, ЎзА