Хорижий давлатлар билан ҳамкорлик, айниқса, парламентлар билан мустаҳкам алоқалар ўрнатилиши ва ривожланиши миллий парламентимиз равнақида, қонун ижодкорлиги жараёнида муҳим ўрин тутади. Шу боис парламент палаталарида қатор давлатлар вакиллари ва парламентарийлари билан учрашув ва мулоқотлар ташкил этилиб, муайян келишувларга эришилмоқда.

Хусусан, Олий Мажлис Қонунчилик палатаси Спикери ўринбосари Раҳимжон Ҳакимов Словения Президентининг халқаро алоқалар бўйича маслаҳатчиси Златко Шабич бошчилигидаги делегация билан учрашди.

Мулоқот аввалида сўнгги йилларда Президент Шавкат Мирзиёевнинг прагматик ташқи сиёсати натижасида Ўзбекистоннинг Европа Иттифоқи давлатлари, шу жумладан, Словения билан ҳамкорлиги мутлақо янги босқичга кўтарилгани, парламентлараро алоқалар ривожланиб бораётганлиги қайд этилди.

Учрашувда делегация аъзоларига Қонунчилик палатасининг таркибий тузилиши, қонун ижодкорлиги йўналишидаги фаолияти ҳақида маълумот берилди.

Ўз навбатида, Златко Шабич Ўзбекистон ва Словения ўртасидаги ҳамкорлик ривожланиб бораётганлиги, бундан ҳар икки томон манфаатдор эканлигини билдирди. Ўзбекистонда Президент бошчилигида кенг кўламли ислоҳотлар ҳар соҳада ўз самарасини бераётганлигини эътироф этди.

Учрашувда парламентлараро алоқаларни янги мазмун билан бойитиш, қонун ижодкорлиги соҳасида тажриба алмашиш масалалари муҳокама қилинди.

Шунингдек, икки давлат ўртасидаги ишбилармонлик муҳитини яхшилаш, товар айрибошлаш ҳажмини ошириш, маданий-гуманитар, таълим ҳамда сунъий интеллект соҳаларида алоқаларни ривожлантириш бўйича фикр алмашилди.

М.Комилова, ЎзА