Мамлакатимизда барча соҳаларда кузатилаётгани каби илмий изланиш борасида ҳам ижобий ўсишга эришилмоқда.

Ўзбекистон миллий метрология институти илмий-конструкторлик лойиҳалари доирасида намунавий ўлчаш воситаларини яратиш ва уларни амалиётга жорий этиш бўйича тизимли ишларни амалга ошириб келмоқда. Ҳаракатлар ўз самарасини бериб, институт олимлари томонидан саноат учун муҳим бўлган 17 турдаги ўлчаш ва синаш ускуналари ишлаб чиқилди.  

Мазкур ускуналарни энергетика, нефть-газ, металлургия, қурилиш, темир йўл транспорти, кимё саноати ва қишлоқ хўжалиги соҳаларида қўллаш мумкин.

Ушбу қурилмалар электр, босим, ҳарорат, сарф, ҳажм, сатҳ ва узунлик каби муҳим кўрсаткичларни юқори аниқликда ўлчаш имконини беради. Қайд этилишича, Барча ўлчовлар миллий эталонларга боғланган қайта тикланувчан ва халқаро стандартларга мувофиқ.

Давлат реестрига киритилган, сифати хорижий аналоглардан қолишмайдиган, нархи арзон ва иқтисодий самарали бўлган ускуналарни 2026 йилдан бошлаб корхона ва ташкилотларга кенг жорий этиш таклиф этилмоқда.

Ушбу ускуналарни ишлаб чиқаришдан мақсад импорт харажатларини камайтириш, миллий ишлаб чиқаришни ривожлантиришдан иборат.  

Таъкидлаш жоизки, илмий ишланмаларни амалиётга татбиқ этиш орқали технологик мустақиллик ва экспорт салоҳиятини янада ошириш мумкин. Мазкур янгилик ҳам шу йўлдаги муҳим қадам бўлса, не ажаб.

Шербек Исломов, ЎзА