Бу ҳақда Марказий банк матбуот хизмати маълум қилди.

Хабарга кўра, Ўзбекистон Республикаси Марказий банки 2021 йилнинг 22 декабридан бошлаб янги кўринишдаги номинал қиймати 50 000 сўм ва 100 000 сўм бўлган банкнот шаклида пул белгиларини муомалага чиқарилиши тўғрисида қарор қабул қилган.

Мазкур банкнотлар мавзуси (тематикаси) “Буюк Ипак йўли” ҳамда мамлакатимиз ҳудудидаги Сурхондарё ва Хоразм вилоятларининг қадимий тарихига бағишланган.

Банкнотлар ҳимояланган қоғозда чоп этилган бўлиб, олд ва орқа томонлари махсус лак билан қопланган.

50 000 сўмлик банкнотнинг олд томони чап қисмида Сурхондарё вилоятида жойлашган XI-XII асрларга тегишли “ABU ISO TERMIZIY MAQBARASI” меъморий ёдгорлиги тасвирланган.

Банкнот орқа томонида эса милоддан аввалги III-I асрларга тегишли бўлган Сурхондарё вилояти ҳудудидаги қадимий ёдгорлик – “FAYOZTEPA ARXEOLOGIYA YODGORLIGI” ифодаланган.

100 000 сўмлик банкнотнинг олд томони чап қисмида Хоразм вилоятининг Хива шаҳрида жойлашган “ICHAN QAL`A” тарихий музейи тасвирланган.

Банкнотнинг орқа томонида эса III-IV асрларга тегишли бўлган қадимий Хоразм давлатининг пойтахти вазифасини бажарган қалъа - “ANGKAQAL`A ARXEOLOGIYA YODGORLIGI” ифодаланган.

ЎзА