Qatar Davlatining “QNA” axborot agentligi O‘zbekiston atrof-muhitni muhofaza qilish va iqlim o‘zgarishi vazirining birinchi o‘rinbosari Obidjon Qudratov va Qatar Atrof-muhit va iqlim o‘zgarishi vaziri o‘rinbosari Abdulaziz Ahmad Abdulloh Ol Mahmud o‘rtasida bo‘lib o‘tgan samarali uchrashuv haqida yozib chiqdi.

Maqolada atrof-muhit va iqlim masalalari bo‘yicha tomonlar o‘rtasida hamkorlik yo‘nalishlari ko‘rib chiqilgani ta’kidlangan. 

Xususan, suhbat chog‘ida cho‘l hududlarida ko‘kalamzorlashtirish tashabbuslari, chang bo‘ronlari va tuproq degradatsiyasiga qarshi kurash, ekologiya va suv resurslari bo‘yicha qo‘shma tadqiqotlar o‘rganildi, shuningdek, tabiiy resurslarni muhofaza qilish sohalarida tajriba almashish, ekologik muammolarni hal etish bo‘yicha birgalikdagi sa’y-harakatlarni kuchaytirish istiqbollari muhokama qilindi. 

Ushbu muloqot global ekologik muammolarni hal etishda O‘zbekiston va Qatar o‘rtasidagi hamkorlikni mustahkamlash, ikki davlatning barqaror rivojlanishga qaratilgan sa’y-harakatlarini muvofiqlashtirish, shuningdek, iqlim o‘zgarishi, cho‘llanish va suv resurslaridan samarali foydalanish kabi yo‘nalishlarda tajriba almashish uchun muhim qadam ekani urg‘ulangan.

Muharrama Pirmatova, O‘zA