Ўзбекистон профессионал бокс федерацияси Осиё WBC иттифоқига аъзоликка қабул қилинди. Бу, ўз навбатида ташкилотнинг Бутунжаҳон бокс уюшмаси (WBC)га қабул қилинганлигини англатади.

Куни кеча шу мазмундаги мактуб Ўзбекистон профессионал бокс федерациясига келди. 

WBC-АBC президенти Ковит Бхакдибхуми томонидан имзоланган мактубда “...улкан мамнуният ила Ўзбекистон профессионал бокс федерацияси сафимизга расман қабул қилинганини эълон қилмоқдамиз. Истеъдодли, келажаги порлоқ ўзбекистонлик профессионал боксчиларга WBC тизимида ўтказиладиган минтақавий чемпионатларда иштирок этиш учун амалий кўмак берилади. Ўзбекистонда WBC байроғи остидаги бокс кечалари ўтказилади”, дейилади.  

WBC дунёдаги энг нуфузли профессионал бокс ташкилоти. 1963 йилда асос солинган. Штаб-квартираси Мексикада. Айни пайтда Маурисио Сулейман WBC президенти. Муҳаммад Али, Жо Фрейзер, Майк Тайсон, Леннокс Льюис, Флойд Мейвезер, Виталий Кличко каби энг донгдор боксчилар ўз вақтида WBC йўналишида жаҳон чемпиони бўлган.  

Жорий йил апрель ойида ўз фаолиятини янги таркиб билан бошлаган Ўзбекистон профессионал бокс федерацияси қисқа муддатда WBC аъзолигига қабул қилинди. Энди WBA, WBO ва IBF сингари бокс ташкилотлари билан ҳамкорлик алоқалари ўрнатилиши кутилмоқда, дейилади Ўзбекистон профессионал бокс федерацияси матбуот хизмати хабарида.  

Шу ўринда бир гап. Ўзбекистон профессионал бокс федерацияси раисининг биринчи ўринбосари Ғофур Раҳимовнинг ташаббуси билан юртимизда илк расмий профессионал бокс мусобақаси 2001 йили Олимпиада ва жаҳон чемпиони Муҳаммадқодир Абдуллаев, ҳаваскорлар ўртасида икки карра жаҳон чемпиони, WBA йўналиши чемпиони Руслан Чагаев, WBO йўналишида икки карра Осиё ва Тинч-Океания минтақаси чемпиони Қувончбек Тойғонбаевлар иштирокида ташкил этилган эди.  

Т.Рўзиев, ЎзА