Бирлашган Араб Амирликлари Халқаро савдо марказида “Мебель, ишлаб чиқариш технологиялари, интерьер ва дизайн – «INDEХ-2022» кўргазмаси иш бошлади. Бу ҳақда Ташқи ишлар вазирлиги матбуот хизмати хабар берган.

Мебель жиҳози, интерьер ускунаси, замонавий технология ишлаб чиқарувчилари ўзларининг энг сара тажрибасини намойиш этаётган мазкур тадбирда дунёнинг 50 га яқин мамлакати, жумладан, Ўзбекистон, АҚШ, Буюк Британия, Франция, Польша, Туркия, Покистон, Хитой, Ҳиндистон, Бангладеш, Тунис, БАА, Саудия Арабистони, Испания, Италия, Германия, Греция, Миср, Индонезия, Малайзия, Япония, Жанубий Корея, Филиппин, Таиланд, Мексика компаниялари маҳсулот ва хизматларни таклиф этмоқда.

Кўргазмада Ўзбекистоннинг БААдаги элчихонаси ҳамда мамлакатимизнинг Дубайдаги Бош консулхонаси кўмагида республикамизнинг “Treet”, “Aiko”, “Ixlos mebel”, “Meyos”, “Mix Info”, “Afat”, “Honor” вa “Isom Sayf” интерьер дизайнерлари томонидан тақдим этилган мебель буюмларидан иборат “Made in Uzbekistan” стенди ташкил этилди.

Ўзбек дипломатлари томонидан икки томонлама манфаатдор ҳамкорликни ўрнатиш мақсадида юртимиздан келган тадбиркорлар учун мебель, ишлаб чиқариш технологиялари, интерьер ва дизайн соҳасида фаолият кўрсатувчи етакчи компаниялар раҳбарлари, импортчи ва дистрибьюторлар билан учрашувлар ташкил этилиб, ҳамкорларга кенг турдаги мамлакатимиз маҳсулотлари билан танишиш, янги шериклар топиш имкони тақдим этилмоқда.

ЎзА