Корея Республикасининг Буэо шаҳри ҳокими Парк Жонг Хён бошчилигидаги делегация Наманган шаҳрида бўлиб турибди.

Наманган вилояти ҳокими Шавкат Абдураззоқов Маърифат марказида меҳмонлар билан учрашув ўтказди.

- Бугунги учрашув икки томонлама ўзаро ҳамкорлик алоқаларини мустаҳкамлаш ва ривожлантиришга хизмат қилади. Бугунги кунда вилоятда 25 дан ортиқ қўшма корхона фаолият кўрсатмоқда. Вилоятда таълим соҳасида бир қатор ижобий ишлар амалга оширилди. Шу билан биргаликда илмий-техникавий ҳамкорликни ривожлантириш бўйича Наманган шаҳрида Кореялик дастурчилар ва IT мутахассислари билан бирга янги “IT School” ўз фаолиятини бошлаган. Замонавий лаборатория ташкил этиш, қишлоқ хўжалиги технологияларини Жанубий Корея тажрибасини мутахассисларга ўргатиш, малакасини ошириш ҳамда ишга жалб этиш бўйича ҳамкорликдаги ишларимиз янада кенгаяди, - деди вилоят раҳбари.  

[gallery-12204]

Буэо ҳокими Парк Жонг Хён эса ўз сўзида картошка уруғчилигини ривожлантириш ва смарт фарм лойиҳасини амалга ошириш, IT, туризм соҳаларида ҳамкорликни янги босқичга олиб чиқиш даври келганлигини таъкидлади.  

Ҳар икки ҳудуд мутахассисларининг тақдимотларидан сўнг, турли соҳаларда ҳамкорликни кўзда тутувчи меморандум имзоланди.

Шунингдек, ташриф кун тартибидан саноат корхоналари, қишлоқ хўжалиги объектлари билан танишиш, Наманган шаҳрида “62-Халқаро гуллар фестивали” доирасида ташкил этилган Гуллар композицияларини томоша қилиш ўрин олган.

Ҳотам МАМАДАЛИЕВ (сурат), ЎзА