Рақамли технологиялар вазирлиги ва IT Park Uzbekistan делегацияси Қозоғистонда “OSON” компанияси раҳбарияти билан учрашди.

Учрашувда томонлар Олмаотада ўз ваколатхонасини очган ушбу компаниянинг жорий ютуқларини муҳокама қилдилар.

Мазкур компания Ўзбекистонда муваффақиятли шаклланган IT-экотизим маҳсули бўлиб, унинг Қозоғистондаги кенгайиши Ўзбекистон IT-секторининг халқаро миқёсда ривожланаётганидан далолат.

Бу нафақат битта компаниянинг чет эл бозорига чиқиши, балки Ўзбекистон IT-компаниялари ўз фаолиятини кенгайтириб, минтақада етакчига айланаётганини кўрсатади.

Учрашув давомида компаниянинг Қозоғистондаги фаолияти натижалари, мижозлар базасининг ўсиши, муваффақиятли лойиҳалар ва ҳамкорлик алоқаларининг мустаҳкамланиши ҳақида маълумот берилди.

Бундан ташқари, компания вакиллари 2025 ва 2026 йилларга мўлжалланган стратегик ривожланиш режаси билан ўртоқлашдилар ҳамда компаниянинг келгусидаги режалари тақдимот қилинди.

Н.Раҳмонова, ЎзА