ХХР раиси Си Цзиньпиннинг рафиқаси Пэн Лиюань 19 май куни Ўзбекистон Президентининг рафиқаси Зироат Мирзиёева ва Қирғизистон Президентининг рафиқаси Айгул Жапаровани Шэньси провинцияси (Шимоли-Ғарбий Хитой) Сиань шаҳридаги “Исушэ” тарихий театрига таклиф қилди.

Бу ҳақда Хитой Халқ Республикасининг Синьхуа ахборот агентлиги хабар берди.  

Агентлик хабарига кўра, Пэн Лиюань  дастлаб меҳмонларни “Исушэ” театри ҳудудидаги “Циньцян” опера санъати музейига олиб борди, у ерда меҳмонлар халқ операси билан боғлиқ нафис экспонатларни томоша қилишди.  

“Улар фреска олдида тўхтаб, Тан сулоласи ҳукмронлиги даврида ғарбий ҳудудлардаги маҳаллий мусиқачилар ва ижрочилар тасвирланган ёрқин саҳнани кўздан кечиришди. Шунингдек, Хитойда “Циньян” опера санъатининг ривожланиши ҳақидаги батафсил ҳикояни тинглашди. Пэн Лиюань ва меҳмонлар  кўргазмалар залида соялар театри учун қўғирчоқларни бўяшда иштирок этишди ва халқ ижоди усталари билан суҳбатлашишди”, – дейилади хабарда.  

“Исушэ” театрида биринчи хонимлар “Циньян” опера санъатининг мумтоз намуналаридан фрагментларни томоша қилишди.  

Пэн Лиюань Марказий Осиё давлатлари билан маданий алмашинувлар ва ҳамкорликни мустаҳкамлаш ҳамда халқлар ўртасидаги ўзаро тушуниш ва дўстликка кўмаклашишга тайёр эканлигини билдирди. Ўз навбатида Зироат Мирзиёева ва Айгул Жапарова Буюк ипак йўли Марказий Осиё ва Хитой маданиятларини бирлаштирганини таъкидлади. Томонлар гуманитар алмашинувлар ва маданиятлараро ўзаро тажриба алмашишнинг  мустаҳкамланишига умид билдирди.  

Маълумотларга кўра, “Исушэ” театри ўзида хитой анъанавий  санъатининг ҳар хил турлари, жумладан, опера, анъанавий рақслар, ашула айтиш ва хитой чолғу асбобларида мусиқа ижро этишни қамраб олади. Ушбу театр Сианда сайёҳларни жалб қилувчи энг оммабоп жой ҳисобланади.  

Таъкидланишича, биринчи хонимларнинг учрашуви илиқ ва дўстона муҳитда ўтди.  

Шунингдек, шу куннинг ўзида “Терракота армияси музейи” деб танилган император Цин Шихуанди мақбарасига ҳам ташриф буюрилди. Қадимги дунёнинг саккизинчи мўъжизаси деб аталадиган Хитойнинг биринчи императори мақбараси ЮНЕСКОнинг жаҳон маданий мероси рўйхатига киритилган.

<iframe width="560" height="315" src="https://www.youtube.com/embed/taIyJhOjcKQ" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Эслатиб ўтамиз, Ўзбекистон Республикаси Президенти Шавкат Мирзиёев Хитой Халқ Республикаси Раиси Си Цзиньпиннинг таклифига биноан 18-19 май кунлари давлат ташрифи билан ушбу мамлакатда бўлди.  

<iframe width="560" height="315" src="https://www.youtube.com/embed/ogFjePAQ-PI" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

ЎзА