Берлин шаҳрида Жиззах вилоятининг Бахмал туманида заъфарон доривор ўсимлигини етиштирувчи “BMB Trade Group” компанияси вакиллари ҳамда германиялик ишбилармонлар ўртасида иқтисодий ҳамкорлик масалаларида дўстона учрашувлар бўлиб ўтди.

Ўзбекистоннинг хориждаги дипломатик ваколатхоналари томонидан маҳаллий бизнес ва Европа ишбилармон доиралари ўртасида икки томонлама ҳамкорликни йўлга қўйиш ва янада ривожлантириш масаласига кейинги йилларда катта эътибор қаратилмоқда.

“BMB Trade Group” компанияси кузатув кенгаши раиси Бекзод Маматқулов ҳамда Германия кичик ва ўрта бизнес уюшмаси бошқарувчи бизнес менежери жаноб Рейнхолд Унгерн-Стернберг билан Ўзбекистоннинг Германиядаги элчихонаси кўмагида ўтказилган музокаралар доирасида икки мамлакат компаниялари ўртасидаги ўзаро савдо ҳажмини ошириш бўйича стратегик шериклик масалалари муҳокама қилинди.  

Учрашувлар давомида яқин келажакда мазкур ҳамкорлик доирасида режалаштирилган амалий тадбирларни ташкил қилиш ва амалга ошириш мақсадида Германия кичик ва ўрта бизнес уюшмаси делегациясининг Ўзбекистонга ташрифи хусусида ҳам келишиб олинди.

Германиянинг “Blumental Bayern GmbH” компанияси вакиллари билан бўлиб ўтган учрашув якунлари бўйича AҚШ ва Европа мамлакатлари бозорларига доривор ўсимликлар, жумладан, заъфарон ҳамда қуритилган мева маҳсултларини йирик ҳажмда етказиб бериш борасида ўзаро келишувга эришилди.  

Шунингдек, таркибига “BMB Za’faron” бренди остида етиштирилаётган заъфарон маҳсулоти қўшилган дори воситаларини ишлаб чиқариш бўйича қўшма инвестиция лойиҳасини амалга ошириш режалаштирилганини ҳам алоҳида таъкидлаш жоиз.

Бундан ташқари, Германиянинг машҳур “VAMED AG” компанияси бошқаруви раиси, жаноб Эрнст Вастлер билан бўлиб ўтган учрашув давомида тиббиёт соҳасида қўшма лойиҳаларни амалга ошириш, шунингдек, Ўзбекистонда тиббий клиникалар тармоғини яратиш истиқболлари атрофлича муҳокама қилинди. Жумладан, жорий йилнинг декабрь ойида германиялик компания делегацияси қўшма лойиҳани батафсил ўрганиш мақсадида мамлакатимизга келиши кутилаётгани таҳсинга лойиқ.

Шу ўринда, “BMB Trade Group” делегацияси Германия агробизнес альянси директори жаноб Пер Бродерсен билан биргаликда Германиянинг етакчи ишлаб чиқарувчиларининг инновацион технологияларини Ўзбекистондаги қишлоқ хўжалиги лойиҳаларига жалб этиш, икки давлат ишбилармон доиралари вакиллари ўртасидаги алоқаларни мустаҳкамлаш, каби кенг кўламли стратегик ҳамкорлик масалалари ҳам ишлаб чиқилганини алоҳида қайд этиш лозим.

Европанинг энг ривожланган давлатларидан бири Германияда бўлиб ўтган ушбу музокаралар агробизнес соҳасида Ўзбекистон – Германия лойиҳаларини амалга ошириш имкониятларини янада кенгайтириш учун мустаҳкам замин яратиши шубҳасиз.

А.ҚАЮМОВ, ЎзА