Мамлакатимиз спорт мухлисларининг хабари бор, яқинда футзал бўйича асосий терма жамоамиз Таиландда бўлиб ўтган Осиё кубоги баҳсларида муваффақиятли иштирок этиб, бронза медалларни қўлга киритди. Ушбу йирик мусобақадан сўнг ФИФА футзал миллий жамоаларининг янгиланган рейтингини эълон қилди. Рўйхатда 1288,96 очко жамғарган Ўзбекистон 11-ўринни банд этган. Эътироф этиш керак, бу Осиё миқёсида учинчи кўрсаткич.

Бразилия ФИФА рейтингида биринчи ўринни эгаллаб турибди. Амалдаги Жаҳон чемпиони Португалия эса Испанияни ортда қолдирган ҳолда иккинчи поғонага кўтарилган. Кучли бешликда Эрон ва Аргентина ҳам бор.

Энг кучли шу беш жамоа ва Ўзбекистон футзал миллий термаси жаҳон чемпионатига қуръа ташлаш маросимида 1-саватчага жойлаштирилади. 2-саватчадан Марокаш, Қозоғистон, Таиланд, Франция, Украина ва Парагвай тақсимланади. Шу тариқа футзал бўйича ЖЧ-2024 иштирокчилари ФИФА рейтингида эгаллаган ўринларига қараб гуруҳларга ажратилади.

Эслатиб ўтамиз, ФИФА футзал бўйича “Жаҳон чемпионати-2024”ни ташкил этиш Ўзбекистонга ишониб топширган. Яъни, мазкур нуфузли спорт анжуманида қатнашиш учун 14 сентябрь – 6 октябрь кунлари жаҳон футзалининг энг кучлилари юртимизда жам бўлади.

Мусобақанинг расмий қуръа ташлаш маросими 26 май куни Самарқанд шаҳридаги афсонавий Регистон майдонида бўлиб ўтади.

Хосе Венансио Лопес бошқарувидаги Ўзбекистон футзал миллий терма жамоаси масъулиятли турнирга тайёргарлик доирасида 6 ва 8 сентябрь кунлари ФИФА рейтинги етакчиси Бразилияга қарши икки ўртоқлик учрашувини ўтказади.

Ғ.Хонназаров,

ЎзА