Энергетика вазири Жўрабек Мирзамаҳмудов ва Франция ташқи савдо, иқтисодий жозибадорлик ва хориждаги француз фуқароларининг ишлари бўйича вазир-делегати Оливье Бешт бошчилигидаги делегация аъзолари ўртасида учрашув бўлиб ўтди. Бу ҳақда вазирлик матбуот хизмати маълум қилди.

Учрашувда томонлар икки мамлакат ҳамкорлигида амалга  оширилаётган ишлар ҳақида сўз юритди. Жумладан, “Voltalia” компанияси томонидан Хоразм вилоятида қуввати 100 МВт бўлган қуёш фотоэлектр станциясини қуриш лойиҳаси бўйича ўтказилган тендерда ғолиб бўлиб, ҳозирда молиявий якунланиш чоралари кўрилмоқда.

“Total Eren” компанияси томонидан 2022 йил май ойида Самарқанд вилоятида қуввати 100 МВт бўлган қуёш фотоэлектр станцияси муваффақиятли ишга туширилган. Эндиликда эса мазкур станциянинг қувватини яна 100 МВтга ошириш масаласи кўриб чиқилди. Бундан ташқари, компания Самарқанд ва Қашқадарё вилоятларида ҳар бирининг қуввати 450 МВтдан бўлган қуёш фотоэлектр станциялари қурилишига қизиқиш билдирмоқда.  

“EDF” компанияси билан ҳамкорликда Сирдарё ва Сурхондарё вилоятларида иссиқлик электр станцияларини қуриш лойиҳалари доирасида амалга оширилаётган ишларни жадаллаштириш чоралари кўрилмоқда.

Шунингдек, учрашувда “Bureau Veritas” ва “Technip” компаниялари билан илмий-тадқиқот ва муҳандислик йўналишларида ҳамкорлик ва “Aksens” компанияси билан биргаликда мамлакатимизда катализаторларни ишлаб чиқариш истиқболлари ҳақида ҳам сўз борди.

Н.Зиёдуллаева тайёрлади, ЎзА