Ўзбекистон Республикаси Экология ва иқлим ўзгариши миллий қўмитаси вакиллари Боку шаҳрида энергия тежовчи совитиш тизимларига оид янги минтақавий лойиҳани тасдиқлаш йиғилишида иштирок этди.

Тадбирда Ўзбекистон, Озарбайжон, Қозоғистон, Украина делегациялари қатнашиб, Global экологик фонд (GEF) томонидан қўллаб-қувватланадиган ва БМТнинг Саноатни ривожлантириш ташкилоти (UNIDO) амалга оширадиган ташаббусни мувофиқлаштириш бўйича келишувга эришилди.

Лойиҳа саноат, қишлоқ хўжалиги ва озиқ-овқат тизимлари ҳамда аҳоли учун ишончли хизматларни таъминлаган ҳолда иқлимга мос замонавий совитиш технологияларига ўтишни жадаллаштиришга қаратилган.

Глобал исиш ва қишлоқ хўжалиги, соғлиқни сақлаш, ишлаб чиқариш ҳамда савдода совитиш ускуналарига бўлган талаб ортиб бораётган шароитда мазкур соҳани модернизация қилиш стратегик аҳамият касб этмоқда.

Учрашувда глобал исиш салоҳияти юқори бўлган иссиқхона газлари — гидрофторуглеродларни босқичма-босқич қисқартириш масаласига алоҳида эътибор қаратилди.

Бу жараён экологик тоза муқобил технологияларга ўтишни рағбатлантириб, Марказий Осиё ва Шарқий Европа мамлакатлари учун янги технологик имкониятлар яратади. Шу билан бирга, бу ўзгаришлар катта инвестициялар, такомиллаштирилган меъёрий-ҳуқуқий база ва малакали кадрлар тайёрлашни талаб этади.

Лойиҳа иштирокчи мамлакатларга миллий совитиш ва кондиционер ускуналари секторларининг эҳтиёжларини таҳлил қилиш, энергия тежовчи замонавий технологияларни намойиш этиш, совиткичларни йиғиш, қайта ишлаш ва хавфсиз йўқ қилиш тизимларини такомиллаштириш, шунингдек институционал ва инсон ресурслари салоҳиятини ривожлантириш каби йўналишларда амалий ёрдам кўрсатади.

Шунингдек, ўқув дастурлари, билим алмашиш ва минтақавий ҳамкорлик тармоқларини кенгайтиришга алоҳида эътибор қаратилади.

Учрашув якунида томонлар лойиҳа ҳужжати бўйича келишувга эришиб, техник жиҳатларни аниқлаштириш ҳамда биргаликда молиялаштиришни тасдиқлаш каби кейинги босқичларни белгилаб олди. Ташаббус Самарқанд шаҳрида бўлиб ўтадиган GEF Ассамблеясида тақдим этилиши кутилмоқда. Бу эса минтақада энергия тежамкор совитишни ривожлантиришга қаратилган саъй-ҳаракатларга халқаро эътиборни янада кучайтиради.

Муҳайё Тошқораева, ЎзА