Яқинда мамлакатимизнинг Германиядаги элчихонасида ўтказилган тадбир шундай номланди.

“ITB Berlin” халқаро туризм ярмаркаси доирасида ташкил этилган ушбу тадбирда Ўзбекистоннинг Германиядаги Фавқулодда ва мухтор элчиси Дилшод Аҳатов, Туризм қўмитаси раиси Умид Шодиев, Германия сайёҳлик агентликлари уюшмаси президенти Норберт Фибиг ва бошқалар  икки давлат ўртасида туризм соҳасидаги ҳамкорлик истиқболлари ҳақида тўхталиб ўтди.  

Таъкидланганидек, кейинги йилларда мамлакатимизда туризмни ривожлантиришга алоҳида эътибор қаратилмоқда. Хусусан, Ўзбекистоннинг бой тарихий, маданий мероси, уни сақлаш ва дунё сайёҳларига намойиш этиш бўйича тизимли  ишлар олиб борилаётир. Айниқса, бунда Ўзбекистон ва Германия туристик фирмалари ўртасидаги икки томонлама ҳамкорликни янада кенгайтириш, туризмнинг турли йўналишлари бўйича биргаликда ишлаш борасида катта имкониятлар мавжудлиги янада аҳамиятли.  

Тадбир давомида “Ахсикент археологик боғи” китобининг тақдимоти ўтказилиши иштирокчиларда катта қизиқиш уйғотди. Шунингдек, юртимиз сайёҳлик салоҳиятига доир видеороликлар намойиш этилди.    

Мамлакатимиздан келган санъаткорларнинг мусиқий чиқишлари эса тадбирга байрамона шукуҳ бағишлади. 

Н.Зиёдуллаева,  

ЎзА