O‘zA “Tashqi diplomatiya” rukni ostida mamlakatimizning xorijdagi elchixonalari va konsullik muassasalaridagi faoliyatini yoritishda davom etadi. Bunda mamlakatimiz elchilari tomonidan iqtisodiy diplomatiyani rivojlantirish, siyosiy aloqalarni mustahkamlash, madaniy-gumanitar hamkorlikni kengaytirish va xalqaro maydonda milliy manfaatlarimizni ilgari surish borasida olib borilayotgan ishlar tahliliga alohida e’tibor qaratiladi.

Ushbu rukndagi materiallar diplomatik missiyalarimizning investitsiyalarni jalb qilish, tashqi iqtisodiy aloqalarni rivojlantirish, mahalliy mahsulotlar eksportini qo‘llab-quvvatlash hamda xalqlar o‘rtasidagi ishonch va hamjihatlikni kuchaytirishga qo‘shayotgan hissasini yoritishga  qaratilgan. 

Abha. O‘zbekiston elchisi Nodirjon Turg‘unov Abhadagi Qirol Xolid  universiteti rektori, doktor Falix ibn Rajalloh al-Salmiy bilan uchrashdi. Tomonlar O‘zbekiston Prezidentining 2022 yil avgust oyida Saudiya Arabistoniga  tashrifi  chog‘ida imzolangan  O‘zaro anglashuv memorandumi doirasida ta’lim sohasidagi hamkorlikni kengaytirish masalalarini muhokama qildi. Saudiya Arabistoni vakili hamkorlikni  faollashtirishga tayyorligini bildirdi. Universitetda 60 mingga yaqin, shu jumladan 2500 nafar xorijiy talaba tahsil oladi. Bu yerda arab tilini o‘rganish  va xorijiy  oliy o‘quv yurtlari bilan hamkorlik qilish uchun barcha sharoitlar yaratilgan. 

Abu-Dabi. O‘zbekistonning Saudiya Arabistonidagi elchisi Abdulaziz Oqqulov “UAE University” prorektori, professor Ahmad Ali Alraisiy  bilan uchrashdi. Uchrashuvda ta’lim sohasidagi hamkorlikni rivojlantirish, xususan, O‘zbekistonda universitetning filialini ochish, Toshkent  axborot texnologiyalari universiteti bilan hamkorlikda qo‘shma dastur hamda qishloq xo‘jaligi va ekologiya bo‘yicha loyihalarni amalga oshirish masalalari muhokama qilindi. 

Shu bilan birga, tomonlar BAA universiteti Qishloq xo‘jaligi va veterinariya kolleji, Markaziy Osiyo atrof-muhit va iqlim o‘zgarishini o‘rganish universiteti va  Toshkent davlat agrar universiteti o‘rtasida hamkorlikni yo‘lga qo‘yish hamda  takdqiqot dasturini amalga oshirish, shuningdek, Toshkent davlat iqtisodiyot  universiteti bilan hamkorlikda  iqtisodiyot va biznes yo‘nalishidagi talabalar uchun BAAda 10 kunlik stajirovkalarni tashkil qilish masalalarini ko‘rib chiqdi.

Rim. O‘zbekistonning Italiyadagi elchisi Abat Fayzullayev Venetsiyadagi  Ka’Foskari universiteti rektori  Titsiana Lippella bilan onlayn-uchrashuv o‘tkazdi. Tomonlar 2026  yilning boshida bo‘lib o‘tadigan O‘zbekiston va Italiya ta’lim forumiga tayyorgarlik masalalarini muhokama qildi. Shuningdek, Ka’Foskari universiteti va O‘zbekiston davlat jahon tillari universiteti hamkorligida “Marko Poloning sayohati” asarini o‘zbek tiliga tarjima qilish ishlari  yakunlangani, Toshkentda uning  taqdimoti o‘tkazilishi aytib o‘tildi. 

Tokio. O‘zbekistonning Yaponiyadagi elchisi Muxsinxo‘ja Abdurahmonov ushbu mamlakat  Parlamenti Vakillar palatasi deputati, Yaponiya parlamentining O‘zbekiston bilan do‘stlik ligasi bosh kotibi Yasutosi Nisimura bilan uchrashuv o‘tkazdi. Muzokaralarda  ikki mamlakat o‘rtasidagi  parlamentlararo  hamkorlikni kengaytirish,  savdo-iqtisodiy, madaniy-gumanitar, ta’lim, turizm kabi  yo‘nalishlarda o‘zaro hamkorlikni rivojlantirish masalalariga  alohida e’tibor qaratildi.  Bosh kotib bu borada amaliy yordam ko‘rsatishga tayyorligini bildirdi. 

Riga. Latviyada 4 sentyabr kuni boshlangan  O‘zbekiston madaniyati kunlari doirasida Rigada  birinchi O‘zbekiston-Latviya  rektorlari forumi bo‘lib o‘tdi. Unda  ikki mamlakatning 50 dan ortiq yetakchi universitetlari rahbarlari ishtirok etdi. Tadbirni  O‘zbekiston Oliy  ta’lim, fan va innovatsiyalar  vaziri Qo‘ng‘irotboy Sharipov va Latviya ta’lim va fan  vaziri Datse Melbarde ochib berdi.

Forumda birgalikda uslubiy va amaliy dasturlarni tayyorlash, talabalar almashinuvi, diplomlarni o‘zaro tan olish amaliyotini  joriy qilish, o‘qituvchilar malakasini oshirish, ta’lim jarayonida axborot texnologiyalarida keng foydalanish va kadrlar tayyorlash  sifatini oshirishga  yangicha yondashuvlar kabi yo‘nalishlarda hamkorlikni rivojlantirish masalalari muhokama qilindi. 

Shuningdek, forumda bakalavriat, magistratura, aspirantura, doktorantura bosqichlarida ilmiy-pedagogik va boshqaruv xodimlari o‘rtasidagi almashinuv,  ilmiy, akademik va madaniy  hamkorlikni rivojlantirish,  qo‘shma loyihalarni  ishlab chiqish, tadqiqot loyihalari uchun  Latviya va Yevropa Ittifoqining grant mablag‘larini jalb qilishni ko‘zda tutadigan  30 dan ziyod tegishli kelishuv imzolandi. 

Leypsig. Germaniyaning Leypsig shahridagi Hunarmandlar palatasi o‘quv-texnologik  markazida Qashqadaryo viloyati  politexnikumlari o‘qituvchilariga   malaka oshirish   sertifikatlarini tantanali topshirish marosimi bo‘lib o‘tdi. Germaniya standartlari bo‘yicha kasbiy o‘qitishga qaratilgan mazkur loyiha doirasida viloyatdagi tanlab olingan 6 ta politexnikumlarning 24 nafar o‘qituvchilari ikki oylik  malaka oshirish  kursida o‘qishdi. Endi ular ushbu xalqaro darajadagi malaka sertifikati bilan yoshlarga “qurilish” va  “metallar texnologiyasi” mutaxassisliklari bo‘yicha ta’lim beradi. 

Loyihaga ko‘ra, Germaniya  kasbiy malaka imtihonidan muvaffaqiyatli o‘tgan  bitiruvchilarga  ushbu mamlakatda  ishlash huquqini beruvchi diplom topshiriladi. 

Bryussel. O‘zbekistonning Belgiyadagi elchixonasida mamlakatimiz  mustaqilligining  34-yilligiga bag‘ishlangan  tantanali qabul  bo‘lib o‘tdi. Unda 250 dan ortiq mehmon, shu jumladan Benilyuks va  Yevropa Ittifoqi  mamlakatlari siyosatchilari, ekspertlari, ishbilarmon doira vakillari, diplomatik korpus a’zolari, Yevropaning yetakchi ommaviy axborot vositalari hamda Belgiya, Niderlandiya va Lyuksemburgda istiqomat qilayotgan vatandoshlarimiz ishtirok etdi. Tadbirda ichki siyosatning ustuvor yo‘nalishlari –  ta’lim sohasini rivojlantirish, biznesni qo‘llab-quvvatlash, odil sudlovni ta’minlash,  sog‘liqni saqlash  sohasini modernizatsiya qilish va  eklogik barqarorlikni mustahkamlash masalalariga alohida e’tibor qaratildi. O‘zbekiston va Yevropa Ittifoqi o‘rtasidagi munosabatlar kengayib borayotgani  alohida qayd etildi. O‘zaro ishonchning ortib borayotgani, siyosiy muloqot, iqtisodiy va madaniy hamkorlik faollashgani ta’kidlandi.  O‘zbekistonning Yevropa Ittifoqi va Benilyuks mamlakatlari bilan strategik sherikligi yanada chuqurlashishiga ishonch bildirildi. 

Aziza Alimova, O‘zA