Бугун, 30 январь куни Россия Федерацияси пойтахти Москва шаҳрида ташкил этиладиган профессионал бокс оқшомида яқинда пойтахтимиз Тошкентда ўтказилган мамлакат биринчилигида -70 килограмм вазнда Ўзбекистон чемпионлигига эришган Ҳавасбек Асадуллаев рингга кўтарилади.

Москванинг "Лужники" спорт мажмуасида ўтадиган IBA.PRO 14 турнирида боксчимиз Ҳавасбек Асадуллаев профессионаллар ўртасида Россия чемпиони Алан Хугаев билан жанг олиб боради.

Ўзбек профессионал боксининг ёрқин вакили Артур Григорян фахрий меҳмон сифатида иштирок этган тарози ва face to face маросимида Хугаев 66,65 кг., Асадуллаев 66,7 кг. тош босган ҳолда белгиланган вазн меъёрини бажарди.

Айтиш лозим, Андижон бокс мактаби тарбияланувчиси Асадуллаев профессионал боксда 7 та жанг ўтказиб, барчасида ғалаба қозонган. Унинг рақиби Алан Хугаев 21 жангининг 10 тасида рақибларини накоутга учратган.

IBA Pro турнирининг асосий жанги супероғир вазнда IBA.PRO Intercontinental камари учун ўтказилади. 10-раундлик жангда россиялик Мурад Халидов (11-0, 6 КО) кубалик Хосе Лардуэт (15-1, 13 КО) қаршилигини енгишга ҳаракат қилади.

Шунингдек, ушбу профессионал бокс тадбирида оғир вазнли россиялик Давид Суров доминиканлик Луис Альфредо Алькантара Герреро билан тўқнаш келади.

Т.Рўзиев, ЎзА