Футбол бўйича Ўзбекистон чемпионати суперлигаси 22-турининг 3 та баҳси бўлиб ўтди. Жиззахда чемпионлик курашидан умидини узган “Сўғдиёна” суперлигада жон сақлаб қолиш учун жанг олиб бораётган Термизнинг “Сурхон” клубини қабул қилди.

Улуғбек Бақоев шогирдлари бу турда ҳам сурхондарёлик футболчиларга имкониятни бой бериб қўйди. Учрашувнинг 6-дақиқасида “Сурхон”нинг иқтидорли футболчиси Камрон Сайдазимовнинг жаримадан йўллаган зарбаси гол билан якунланди – 0:1.

Ана шу ҳисоб учрашув сўнгигача ўзгармади.

Ўйиндан кейин матбуот анжумани ташкил этилди.  

Шу куни Фарғонадаги қайта реконструкция қилиниб янги очилган “Истиқлол” стадионида ўтган “Нефтчи” – “Навбаҳор” баҳсида меҳмонларнинг қўли баланд келди ва наманганлик футболчилар 1:2 ҳисобида зафар қучди.

Тошкентдаги “Пахтакор” – “Қўқон-1912” баҳсида эса меҳмонлар биринчи бўлиб ҳисобни очган бўлса-да, якунида майдон эгалари йирик – 5:2 ҳисобида ғалабага эришди.

А.Қаюмов, ЎзА