Америка Қўшма Штатларининг Ўзбекистондаги Фавқулодда ва мухтор элчиси Жонатан Хеник ҳамда Ўзбекистон Техник жиҳатдан тартибга солиш агентлиги директори Акмал Жуманазаров ўртасида учрашув бўлиб ўтди.
Маълумот учун, Ўзбекистон ва Америка Қўшма Штатлари ўртасидаги ўзаро товар айирбошлаш ҳажми сўнгги икки йилда 1 миллиард доллардан ошди. АҚШ Ўзбекистоннинг 13 энг йирик ташқи савдо ҳамкори ҳисобланади. Айни пайтда мамлакатимиз бозорида 340 га яқин АҚШ компанияси фаолият юритмоқда. Шунингдек, қиймати 35 миллиард долларлик уч йиллик иқтисодий ҳамкорлик дастури амал қилмоқда.
Учрашувда АҚШ анъанавий равишда Ўзбекистоннинг муҳим иқтисодий ҳамкори экани, савдо-иқтисодий алоқаларни ривожлантиришда стандартлаштириш ва техник жиҳатдан тартибга солиш масалалари алоҳида аҳамият касб этиши таъкидланди.
Агентлик ишчи гуруҳининг АҚШга хизмат сафари доирасида American National Standards Institute (ANSI), National Institute of Standards and Technology (NIST), Food and Drug Administration (FDA), International Trade Administration (ITA), Office of the United States Trade Representative (USTR), UL Standards & Engagement (ULSE), Worldwide Responsible Accredited Production (WRAP), American-Uzbekistan Chamber of Commerce, шунингдек Pangea, IBM ва Caterpillar Inc. компаниялари билан ўтказилган учрашувлар ҳамда уларнинг амалий натижалари муҳокама қилинди.
Музокаралар чоғида FDAнинг минтақавий офисини Тошкент шаҳрида очиш, савдодаги техник тўсиқларни бартараф этиш, тўқимачилик маҳсулотлари экспортини АҚШ бозорида кенгайтириш, юқори тоифали эталонлар ва квант метрология лабораторияларини ривожлантириш, сунъий интеллект, кадрлар тайёрлаш ҳамда илм-фан соҳасида ҳамкорликни кучайтириш масалалари юзасидан фикр алмашилди.
Шунингдек, халқаро ва Америка стандартларини қўллашни оммалаштириш, миллий қонунчиликни Жаҳон савдо ташкилоти битим ва қоидаларига мувофиқлаштириш, АҚШ бозорига чиқишда стандарт талаблари бўйича тренинг ва семинарлар ташкил этиш масалаларига алоҳида эътибор қаратилди.
Учрашув якунида томонлар Ўзбекистон ва АҚШ ўртасидаги ҳамкорликни янада кенгайтириш, муҳокама қилинган лойиҳа ва ташаббусларни изчил амалга оширишга тайёр эканликларини билдирди.
Шаҳноза Маматуропова, ЎзА