Маълумки, мамлакатимизда аэропортларни 2035 йилгача ривожлантириш стратегияси ишлаб чиқилган. Бир қанча долзарб вазифалар белгилаб олинган.

“Uzbekistan Airports” АЖ матбуот хизматининг маълум қилишича, Ислом Каримов номидаги Тошкент халқаро аэропортида учиб келиш зали кенг кўламли реконструкциясининг биринчи босқичи якунланди ва залнинг янгиланган ўнг қисми фойдаланишга топширилди. Залнинг умумий майдони кенгайтирилди, автотранспорт ва автобуслар учун янги йўлак қурилди, 120 ўринли автотураргоҳ ташкил этилди ва яшил ҳудуд барпо этилди.

Бино фасадининг кенгайиши учиб келиш зали майдонини 2100 кв.м га ошириш имконини берди. Натижада божхона ҳудуди кенгайтирилди, қўшимча юк карусели ўрнатилди, терминал ичида кутиб олувчилар учун илк бор 120 ўриндиқли ҳудуд ташкил этилди.

Соҳа вакилларининг таъкидлашича, терминалнинг ўнг қисмини кенгайтириш ишлари охирига етказилди. Эндиликда  чап қисмини реконструкция қилиш ишлари бошланади. Аэропорт фаолиятини тўхтатишнинг имкони йўқлиги боис,  таъмирлаш ишлари босқичма-босқич амалга оширилган.  

Қайд этилишича, кутиб олувчилар майдонидан ташқари, қисқа муддатли тўхташ учун залга туташган махсус ажратилган йўлак очилди. Энди зал олдига таксида ҳам, шахсий автомобилларда ва автобусларда ҳам кириш мумкин. Йўлакда туриш вақти жўнаб кетиш залидаги йўлак каби 10 дақиқани ташкил этади.

Реконструкциянинг иккинчи босқичини 2025-йил охиригача якунлаш режалаштирилган. Унинг давомида қўшимча юк ташиш камарини ўрнатиш, кафелар, дўконлар ва бошқа хизматлар жойлашган кутиб олувчилар ҳудудини кенгайтириш назарда тутилган.

Таъмирлаш натижасида терминалнинг умумий майдони 10 000 кв.м дан ошади, ўтказиш қобилияти эса соатига 2400 йўловчига етказилади.

Муҳайё  Тошқораева,

ЎзА