Ўзбекистон 30-Минск халқаро китоб кўргазма-ярмаркасида иштирок этмоқда
Жорий йил 22-26 март кунлари Беларусь пойтахти Минск шаҳрида «Чегараларсиз китоб олами» 30-Минск халқаро китоб кўргазма-ярмаркаси бўлиб ўтмоқда.
АОКА хабарига кўра, анъанавий тарзда ўтказиб келинаётган нуфузли китоб кўргазма-ярмаркасида 20 дан ортиқ мамлакатдан матбаа корхонаси, нашриётлар, шу жумладан, мамлакатимиз нашриёт ва китоб савдоси билан шуғулланувчи ташкилотлар мутасаддилари иштирок этмоқда.
30-Минск халқаро китоб кўргазма-ярмаркасида юртимиздан 10 га яқин нашриётнинг турли жанр ва йўналишдаги 100 дан ортиқ китоби намойиш этилмоқда.
Бу каби халқаро китоб кўргазма-ярмаркалари нафақат турли миллат, халқлар дўстлигини мустаҳкамлашда, балки китоб оламидаги янгиликлар, янги нашрлар, замон ёзувчилари ва шоирлари, тарихни ўрганишда, тажриба алмашишда муҳим аҳамиятга эга.
30-Минск халқаро китоб кўргазма-ярмаркаси 26 мартга қадар давом этади.
ЎзA