Ўзбекистон Республикаси Президентининг “Мамлакат тараққиётининг 2030 йилгача мўлжалланган устувор йўналишлари доирасида ислоҳотларни изчил давом эттириш ва янги босқичга олиб чиқишнинг қўшимча чора-тадбирлари тўғрисида”ги фармонига мувофиқ, "Ўзбекистон - 2030" стратегиясининг тўлиқ, ўз вақтида ва сифатли амалга оширилишини ташкил этиш, ушбу жараёнда масъул вазирлик ва идоралар, маҳаллий ижро этувчи ҳокимият органлари ва хўжалик бирлашмаларининг фаолиятини мувофиқлаштириш Республика комиссиясига юкланади.
"Ўзбекистон - 2030" стратегияси амалга оширилиши устидан назорат қуйидаги тартибда амалга оширилади:
Адлия вазирлиги Ҳисоб палатаси билан биргаликда "Ўзбекистон - 2030" стратегияси мақсадларининг самарадорлик кўрсаткичларига эришишдоирасида норматив-ҳуқуқий ҳужжатлар лойиҳалари ва бошқа чора-тадбирлар дастурлари ўз вақтида ва сифатли ишлаб чиқилишини назорат қилади;
Стратегик ривожланиш ва ислоҳотлар агентлиги "Тараққиёт стратегияси" маркази ва "Юксалиш" ҳаракати билан биргаликда "Ўзбекистон - 2030" стратегияси мақсадларининг самарадорлик кўрсаткичларига эришилиши устидан мониторинг юритади;
Республика комиссияси "Ўзбекистон - 2030" стратегияси доирасида белгиланган вазифаларнинг амалга оширилишида юзага келаётган муаммоларни тезкорлик билан ҳал қилади, заруратга кўра ушбу масалаларни Вазирлар Маҳкамаси Раёсати йиғилишларининг кун тартибига киритиб боради; Вазирлар Маҳкамаси "Ўзбекистон - 2030" стратегияси амалга оширилишининг ҳар ойда Бош вазир ўринбосарлари иштирокида танқидий кўриб чиқилишини таъминлайди. Бунда "Ўзбекистон - 2030" стратегияси мақсадларининг самарадорлик кўрсаткичларига эришмаган вазирлик ва идоралар, маҳаллий ижро этувчи ҳокимият органлари ва хўжалик бирлашмалари раҳбарларига нисбатан тегишли чоралар кўрилади.
"Ўзбекистан - 2030" стратегияси мақсадлари бўйича масъул вазирлик ва идоралар, маҳаллий ижро этувчи ҳокимият органлари ҳамда хўжалик бирлашмалари тегишли самарадорлик кўрсаткичига эришишга бир вақтнинг ўзида асосий ва тенг кучли ижрочилар ҳисобланади.
"Ўзбекистон - 2030" стратегияси мақсадларининг самарадорлик кўрсаткичларига эришилиши устидан мониторинг Агентлик томонидан юритиладиган Стратегик режалаштириш ва ривожланишнинг рақамли платформаси орқали амалга оширилади.
Рақамли платформада "Ўзбекистон - 2030" стратегияси мақсадларининг самарадорлик кўрсаткичларига эришилиши ҳолати қуйидаги тоифаларга ажратилади:
а) "яшил" - белгиланган самарадорлик кўрсаткичига ўз вақтида ва тўлиқ эришилган;
б) "сарқ" - белгиланган самарадорлик кўрсаткичига эришишда кечикишлар мавжуд, бироқ уларни бартараф этиш имкони бор;
в) "қизил" - самарадорлик кўрсаткичига эришишда жиддий кечикишлар мавжуд ёки уларга умуман эришилмаган. Бунда:
"яшил" тоифага киритилган самарадорлик кўрсаткичларига масъул идоралар рағбатлантирилади;
"сариқ" тоифага киритилган самарадорлик кўрсаткичларига эришишда мавжуд кечикишлар сабаблари таҳлил қилинади ҳамда уларни бартараф этиш мақсадида Вазирлар Маҳкамаси томонидан тегишли идорага зарур чораларни кўриш бўйича кўрсатмалар берилади;
"қизил" тоифага киритилган самарадорлик кўрсаткичларига масъул идоралар фаолияти Вазирлар Маҳкамаси Раёсатида танқидий кўриб чиқилади.
ЎзА