“Fitch Ratings” халқаро рейтинг агентлиги “Ўзбекгидроэнерго” акциядорлик жамиятининг халқаро кредит рейтингини BB (барқарор) даражасигача оширди. Бу ҳақда жамиятнинг молия ва рейтинглар билан ишлаш бўлими бошлиғи Лазизхўжа Усмонов АОКАда бўлиб ўтган брифингда маълум қилди.
Унинг сўзларига кўра, халқаро рейтинг ва индексларда юқори натижаларга эришиш жамият фаолиятининг шаффофлиги, молиявий барқарорлиги ва инвестицион жозибадорлигини тасдиқлайди. Халқаро рейтинг агентликлари томонидан берилган баҳолар жамиятнинг ташқи имижи ва ишончли ҳамкор сифатидаги нуфузини мустаҳкамлайди.
Айтиш жоиз, “Ўзбекгидроэнерго” АЖ 2020 йилда “Fitch Ratings” томонидан илк бор B+ (барқарор) рейтингига лойиқ деб топилган. 2021 йилда эса рейтинг BB– (барқарор) даражасига кўтарилган ва сўнгги тўрт йил мобайнида ушбу кўрсаткич сақлаб келинган. Жорий йилнинг 1 июлида эса халқаро рейтинг яна бир поғонага кўтарилиб, BB (барқарор) даражасини ташкил қилди.
Усмоновнинг таъкидлашича, ушбу рейтинг жамият учун халқаро молиявий институтлар билан ҳамкорликни янада кучайтириш, инвесторларни кенг жалб этиш, давлат кафолатисиз кредитлар олиш ҳамда инвестиция лойиҳаларининг молиялаштириш шартларини енгиллаштириш имкониятини яратади.
Сўнгги йилларда “Ўзбекгидроэнерго” АЖ ушбу рейтинг асосида бир қатор инвестиция лойиҳалари учун молия ресурсларини жалб қилишга муваффақ бўлди. Жумладан, “Зарчоб-3” ГЭС ва Катта Андижон каналида кичик ГЭСлар каскади қурилиши учун 5 миллион евро ва 122 миллион юань миқдорида давлат кафолатисиз кредитлар жалб қилинган. 160 мегаваттли “Юқори Пскем” ГЭС лойиҳаси учун АҚШ молия институтидан 70 миллион евро, Хитой молия муассасаларидан эса 285 миллион доллар маблағ ажратиш бўйича келишувларга эришилган.
Брифингда таъкидланишича, жамият рейтингининг юқорилаши нафақат унинг салоҳиятини, балки мамлакатимиз иқтисодиётига бўлган халқаро ишончнинг ортиб бораётганини ҳам кўрсатади. Жамият бугунги кунда мустақил кредит рейтинги бўйича Ўзбекистондаги топ 3 компаниялар қаторига киради.
Бу натижа “Ўзбекгидроэнерго” АЖнинг корпоратив бошқарув тизимини такомиллаштириш, харажатларни оптималлаштириш, хатарларни самарали бошқариш ва энергия ишлаб чиқариш самарадорлигини ошириш борасида амалга оширган ислоҳотлари самарасидир.
Н.Зиёдуллаева, ЎзА