“Ўзбекгидроэнерго” АЖ бошқаруви раиси Абдуғани Сангинов ва Хитойнинг SINTIC компанияси раҳбари Кинг Хубао бошчилигидаги делегация ўртасида икки томонлама учрашув бўлиб ўтди.
Халқаро форум доирасида ўтказилган учрашувда томонлар узоқ йиллар давомида йўлга қўйилган стратегик ҳамкорлик, амалга оширилаётган йирик энергетика лойиҳалари ва келгусидаги қўшма ташаббуслар юзасидан атрофлича фикр алмашди. Унда қайд этилганидек, SINTIC компанияси “Ўзбекгидроэнерго” учун оддий ҳамкор эмас, балки Ўзбекистонда янги гидроэнергетика объектларини барпо этиш ва мавжуд қувватларни модернизация қилишда энг ишончли ва муҳим стратегик шериклардан бирига айланган.
SINTIC билан ҳамкорлик доирасида 2020-2022 йилларда умумий қуввати 62 МВт, йиллик ишлаб чиқариш ҳажми 398 миллион кВт·соат бўлган учта гидроэнергетика объекти муваффақиятли ишга туширилди. Лойиҳаларнинг умумий қиймати 53 млн. АҚШ долларини ташкил этиб, шундан 41 миллион доллар Хитой Эксимбанки томонидан молиялаштирилган.
“Тошкент ГЭС-1”, “Чирчиқ ГЭС-10” ва “Самарқанд ГЭС-2Б”ни модернизация қилиш ишлари юқори касбий стандартлар асосида амалга оширилган бўлиб, ушбу натижалар икки мамлакат ўртасидаги энергетик ҳамкорлик самарадорлигининг ёрқин тасдиғи ҳисобланади.
2023 йилда SINTIC Катта Андижон каналидаги кичик ГЭСлар каскади учун ускуналар етказиб бериш бўйича халқаро тендер ғолиби бўлди ва 18,5 миллион долларлик шартномани амалга оширишга киришди. Ускуналар тўлиқ етказиб берилган, тажрибали хитойлик мутахассислар иштирокида монтаж ва созлаш ишлари жадал давом этмоқда.
Учрашувда жамиятнинг молиявий барқарорлиги борасида эришилган ютуқлар ҳам алоҳида таъкидланди. 2020 йилда “Ўзбекгидроэнерго” Fitch Ratings халқаро агентлиги томонидан B+ рейтингига эга бўлган бўлса, 2021 йилда ушбу кўрсаткич BB- даражасига оширилган ва ҳозирги кунда жамият BB рейтингига эришган.
Шунингдек, “Жинлун” компанияси билан ҳамкорликда 40 МВт гача бўлган гидроэнергетик ускуналар ишлаб чиқарувчи замонавий завод ишга туширилгани қайд этилди. Марказий Осиёда ягона бўлган ушбу корхона томонидан “Норин ГЭС-1” учун ускуналар муваффақиятли тайёрланди ва лойиҳа 2025 йил сентябрда Ўзбекистон Республикаси Президенти иштирокида ишга туширилди.
Учрашувда Қоронғутугай ва Хўжакент ГАЭСларини давлат-хусусий шерикчилик асосида амалга ошириш, шунингдек, бу жараёнда Хитой банкларининг имтиёзли молиявий инструментларини жалб этиш имкониятлари муҳокама қилинди. Томонлар янги таклиф ва стратегик режалар юзасидан фикр алмашиб, қўшма дастурларнинг истиқболларини белгилаб олди.
Жамият ахборот хизматига кўра, учрашув якунида икки ҳамкор ташкилот янги қўшма лойиҳаларни амалга оширишга тайёр эканликларини билдирди.
Н.Зиёдуллаева, ЎзА