Бугун “Ўзбекгидроэнерго” АЖ ва Корея Республикасининг сув лойиҳаларини амалга оширувчи йирик “K-water” корпорацияси вакиллари ўртасида музокаралар бўлиб ўтди. Унда мамлакатимизда қурилиши режалаштирилган Хўжакент гидротўплаш станцияси (ГАЭС) лойиҳасини ҳамкорликда амалга ошириш масаласига эътибор қаратилди.

Икки томонлама ўтказилган учрашувда “Ўзбекгидроэнерго” АЖ бошқаруви раиси Абдуғани Сангинов ҳамда “K-water” компаниясининг вице-президенти Ли Жонг Жин, ушбу компания бош директори Чон Гын Хо, компания катта менежери Ким Чон Мён ва бошқалар иштирок этди. 

Унда лойиҳа Тошкент вилоятининг Бўстонлиқ туманидаги Хўжакент объектида барпо этилиши ҳақида сўз борди. Қайд этилганидек, Хўжакент гидротўплаш станциясининг қуввати 200 мегаватт бўлиб, унинг йиллик ўртача ишлаб чиқариш қуввати 400,0 миллион кВт.соат электр энергиясига тенгдир. 

Учрашув якуни бўйича ҳамкорлик шартномаларини муҳокама қилиш учун дастлаб Хўжакент ГАЭС қурилиши лойиҳасининг дастлабки техник-иқтисодий асосларини ишлаб чиқиш зарурлиги тўғрисида икки томонлама қарор қабул қилинди. 

Музокаралар якунида Хўжакент ГАЭС қурилиши лойиҳаси юзасидан “Ўзбекгидроэнерго” АЖ ва Корея Республикасининг “K-water” корпорацияси ўртасида ўзаро англашув меморандуми имзоланди. 

– Ўзбекистон Республикаси Президенти Шавкат Мирзиёев Корея Республикаси Президенти Мун Чжэ Иннинг таклифига биноан 2021 йил 16-18 декабрь кунлари давлат ташрифи билан Жанубий Кореяда бўлиб, мазкур ташрифи чоғида “яшил” иқтисодиёт, рақамлаштириш, инновациялар ва юқори технологиялар, таълим, соғлиқни сақлаш ва бошқа устувор йўналишларда амалий ҳамкорлик бўйича дастур ва лойиҳаларни илгари суришга алоҳида эътибор қаратган эди, –деди "Ўзбекгидроэнерго" АЖ бошқаруви раисининг Ахборот сиёсати масалалари бўйича маслаҳатчиси, матбуот хизмати бошлиғи Равшан Байкулов. – Мазкур меморандум ва ўзаро ҳамкорлик ишлари Янги Ўзбекистоннинг 2022–2026 йилларга мўлжалланган Тараққиёт стратегиясида юртимизда “яшил” энергетика соҳасини келгусида янада ривожлантиришгақаратилган чора-тадбирлар дастури доирасида, шунингдек, жамият томонидан қайта тикланувчи энергия манбаларини янада ривожлантиришга алоҳида эътибор қаратилган йирик лойиҳалардан биридир. 

Насиба Зиёдуллаева, ЎзА