“Ўзбекгидроэнерго” АЖ бошқаруви раиси Абдуғани Сангинов ва “China National Technical Import and Export Corporation” (CNTIC) компанияси президенти Лю Сюй хоним бошчилигидаги делегация ўртасида учрашув ўтказилди.

Учрашувда томонлар ўзаро ҳамкорлик истиқболларини муҳокама қилди. Таъкидланганидек, улар ўртасида 4 та лойиҳа бўйича ҳамкорлик олиб борилиб, шундан 3 та лойиҳа бўйича ишлар якунига етказилган. Шунингдек, айни кунда икки томон “Наманган вилояти Катта Андижон каналида ГЭСлар каскади қурилиши” лойиҳаси асосида ҳамкорлик ишларини давом эттирмоқда. 

Қайд этиш жоизки, мазкур лойиҳа доирасида асбоб-ускуналарни етказиб бериш бўйича тендер савдоларида Хитойнинг CNTIC компанияси ғолиб бўлган. 2023 йилнинг октябрь ойида томонлар ўртасида тегишли тартибда 18,5 миллион долларлик шартнома имзоланган. Шу билан бирга, лойиҳани молиялаштириш учун 2024 йил 10 октябрда “Ўзбекгидроэнерго” АЖ ва Хитойнинг “China CITIC Bank” ўртасида кредит келишуви имзоланишига эришилган. 

Учрашувда ушбу лойиҳа бўйича ой якунига қадар CNTIC компанияси томонидан зарурий асбоб-ускуналарни етказиб бериш кўзда тутилганлиги қайд этилди. 

Мулоқот чоғида “Ўзбекгидроэнерго” АЖ томонидан 2028 йил якунига қадар гидроэлектр станциялари умумий қувватини 5 508 МВтга етказиш, хусусан, мавжуд гидроэнергетик қувватларни 3,3 ГВт га ошириш кўзда тутилаётганлиги ҳақида сўз борди. Унга кўра, бундай истиқболли лойиҳаларга хорижий инвестицияларни жалб қилиш, тўғридан-тўғри имтиёзли кредитларни йўналтириш муҳимлиги ва CNTIC компаниясига бу борада амалий ҳамкорлик таклиф этилди. 

Тадбир якунида томонлар ўртасида ўзаро ҳамкорлик бўйича келгуси режалар белгилаб олинди. 

Н.Зиёдуллаева, ЎзА