Ўзбекистон давлат жисмоний тарбия ва спорт университетида мукаммал ҳаракатларни ўзида мужассам этган Ўзбек жанг санъати ўқув қўлланмасининг тақдимоти ўтказилди.

Тақдимотда иштирок этган олимлар, спорт соҳаси мутахассислари Ўзбекистонда хизмат кўрсатган спорт устози Пўлат Усмонов муаллифлигида чоп этилган мазкур қўлланма халқимизнинг бой маданий мероси асосида яратилгани билан қадрли эканини таъкидлашди.

Қўлланмада улуғ аждодларимиз Алп Эр Тўнга, Жалолиддин Мангуберди, Темур Малик, Амир Темур, Бобур мирзолар даврида қўлланилган якка кураш усуллари, жанг санъатининг асослари қай даражада шакллангани хусусида сўз борган. Ўзбек жанг санъати нафақат спорт йўналиши, балки ёшларни миллий қадриятлар теграсида бирлаштирадиган маънавий сарчашма экани эътироф этилди.

Эслатиб ўтамиз, 2009 йилдан Ўзбек жанг санъати миллий спорт турлари қаторига киритилган бўлиб, 2025/2026-ўқув йилидан эса Ўзбекистон давлат жисмоний тарбия ва спорт университетида Ўзбек жанг санъати бўйича ўқув йўналиши йўлга қўйилди.

Бугунги кунда мазкур йўналишда таҳсил олаётган талабалар маҳоратли устоз-мураббийлардан ота-боболаримиздан мерос жанг санъати усулларини ўрганмоқда.

Т.Рўзиев,

ЎзА