Ипакчилик илмий-тадқиқот институтида Япониянинг “Cooperative of Japan silk & silk thread development” ипак ишлаб чиқарувчи, “Shin-Masuzawa Industrial” ипак ўраш дастгоҳлари ишлаб чиқарувчи, “Japan International Cooperation Agency” – JICA ҳамда “Ўзбекипаксаноат” уюшмаси раҳбарлари иштирокида амалий мулоқот бўлиб ўтди.

Учрашувда халқаро ҳамкорларга ўзбек ипакчилигининг тарихи ва бугунги истиқболлари хусусида маълумот берилди. Жумладан, ўтган 4-5 йиллик давр мобайнида ушбу соҳага доир ўнлаб қарор ва фармонлар қабул қилингани ва амалиётга босқичма-босқич татбиқ этилаётгани қайд этилди.  

Жаҳон бозори конъюнктурасининг тез фурсатлар билан ўзгариб бораётганлиги, истеъмолчиларнинг талаблари кучаяётганлиги, шунингдек, хорижий бозорларда ўзбек маҳсулотларига бўлган талабнинг ошаётганлиги пиллачилик соҳасини ривожлантириш бўйича кўрилаётган чора-тадбирлар ҳақида сўз юритилди.  

Ҳалқаро ҳамкорлар институтда олиб борилаётган илмий ишланмалар, ипак қурти селекцияси, пиллачиликни механизациялаш, сунъий озуқа яратиш, ипак қурти генетикаси ҳамда ипакчилик соҳасида олиб борилаётган тадқиқотлар билан яқиндан танишди.  

Гулноза Бобоева, ЎзА