Индонезиянинг Жакарта шаҳрида ўтказилган ўсмирлар ва ёшлар ўртасидаги Осиё чемпионатида Ватанимиз шуҳратини улуғлаган ёш дзюдочиларимиз Ислом Каримов номидаги Тошкент халқаро аэропортида тантанали кутиб олинди.

Осиё чемпионатида 14 та медаллар шодасини қўлга киритган ёшлар терма жамоаси ҳамда 18 та медаллар жамланмасига эга чиққан ўсмир дзюдочиларимизни тантанали кутиб олиш маросимида иштирок этган Ўзбекистон спорт вазири ўринбосари Шаҳрилло Маҳмудов, дзюдо федерацияси мутасаддилари, кенг жамоатчилик вакиллари янги Ўзбекистоннинг янги ғалабаларини таъминлашга муносиб ҳисса қўшган маҳоратли спортчиларимизни ғалабалар билан қутлади. 

Ушбу муваффақият яқин келажакда ўтказиладиган жаҳон чемпионатларида ўзбек дзюдосининг натижалари янада яхшиланишига хизмат қилиши билан аҳамиятли эканлиги таъкидланди.

Ўзбекистон ёшлар терма жамоаси 8 та олтин, 3 тадан кумуш ва бронза, ўсмирлар терма жамоамиз эса 7 та олтин, 3 та кумуш, 8 та бронза билан Осиё чемпионатида умумжамоа ҳисобида биринчи ўринларни эгаллагани эътироф этилди. 

Қувонарлиси, ёш спортчиларимизнинг Индонезиядаги ютуғи мамлакатимизда Олимпия ўйинлари дастуридан жой олган дзюдо спортида янги “олтин авлод” вакиллари халқаро спорт майдонида бўй кўрсатаётганини амалда намойиш этди.

<iframe width="650" height="420" src="https://www.youtube.com/embed/kx58HYbIKSI" title="O‘zbek dzyudosining yangi g‘alabalari xalqaro maydonda bo‘y ko‘rsatmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Тўлқин Рўзиев, Жавоҳир Тошхўжаев, Анвархўжа Аҳмедов,ЎзА