Ташкент қаласында Өзбекстанның «Ўзатом» агенттігі мен Францияның «Assystem» компаниясы арасында атом энергетикасы саласындағы ынтымақтастықты одан әрі дамытуға бағытталған өзара түсіністік туралы меморандумға қол қойылды. Бұл құжат тараптар арасында бірлескен кәсіпорын құруды көздейді.

Меморандумға сәйкес, жаңа бірлескен кәсіпорын атом электр станциясының (АЭС) құрылысын техникалық тұрғыда қолдау, жобалық шешімдерді таңдау және оларды біртұтас концепция негізінде қалыптастырумен айналысады. Сондай-ақ, бұл кәсіпорын Өзбекстанның бейбіт ядролық бағдарламасын дамытуға бағытталған бастамаларды іс жүзінде қолдауға атсалысады.

Құжатқа «Ўзатом» агенттігінің басшысы Азим Ахмедхожаев пен «Assystem» компаниясының халықаралық мәселелер жөніндегі аға вице-президенті Кристиан Жанно қол қойды. Кездесу барысында тараптар атом энергетикасы мен озық технологиялар саласындағы өзара тиімді ынтымақтастықтың келешегін талқылады.

Агенттіктің хабарлауынша, «Assystem» — Парижде орналасқан, атом энергетикасы саласында жұмыс істейтін жетекші тәуелсіз инженерлік компаниялардың бірі. Компания әлем бойынша өнеркәсіптік инфрақұрылымдарды, соның ішінде реакторларды жобалау, салу, қадағалау және іске қосу бағытында қызмет көрсетіп келеді.

Бүгінде «Assystem» әлемдегі атом энергетикасы саласындағы үшінші ірі тәуелсіз инженерлік ұйым ретінде танылған. Сонымен қатар, компания цифрлық шешімдер мен жобаларды басқару салаларында да бай тәжірибеге ие болып, жаһандық деңгейде энергетикалық жобаларды жүзеге асыруда сенімді әріптес ретінде танымал.