"Кўксарой" қароргоҳида Президент Шавкат Мирзиёев раислигида Ўзбекистон Республикаси Президенти ҳузуридаги Хорижий инвесторлар кенгашининг биринчи ялпи мажлиси бошланди.

Мажлисда Европа тикланиш ва тараққиёт банки президенти Одиль Рено-Бассо ҳамда қатор хорижий компаниялар раҳбарлари иштирок этмоқда.

Нуфузли анжуманда Ўзбекистон Республикаси Президенти Шавкат Мирзиёев нутқ сўзлади.

–Хорижий инвесторлар кенгашининг биринчи ялпи йиғилишининг барча иштирокчиларини самимий қутлайман. Бугунги анжуманда жаҳоннинг етакчи компаниялари ва молия институтлари раҳбарлари бўлган сиз, қадрли дўстларимиз ва ҳамкорларимизни кўриб турганимдан ғоят мамнунман. Катта ижтимоий-иқтисодий аҳамиятга эга бўлган ушбу 
йиғилишни ташкил этишда кўрсатган кўмаги учун Европа тикланиш 
ва тараққиёт банки президенти ҳурматли Одиль Рено-Бассо хонимга ўз миннатдорчилигимни билдираман, – деди Президентимиз..

Алоҳида қайд этилганидек, бугунги кунда жаҳонда жиддий глобал ўзгаришлар юз бермоқда. Дунё ҳамжамияти пандемиядан халос бўлишга улгурмай, янги қийинчилик 
ва синовларга дуч келмоқда. Турли зиддият ва қарама-қаршиликлар тобора кучайиб бормоқда.

Бундай оғир ва мураккаб шароитда ўзаро ишонч ва ҳурматга асосланган яқин ҳамкорликнинг аҳамияти ҳар томонлама ортиб бормоқда. Айнан шу сабабли Хорижий инвесторлар кенгашининг бугунги йиғилиши алоҳида муҳим аҳамиятга эга эканлиги айтилди.

ЎзА